Transferimi i Kristjan Asllanit te Torino është tashmë çështje e mbyllur, por siç ndodh shpesh në merkato, pas çdo marrëveshjeje fshihen edhe detaje të rëndësishme.
Gazetari i njohur italian, Alfredo Pedullà, ka zbuluar disa prapaskena të këtij operacioni, duke theksuar se marrëveshja nuk është aq e thjeshtë sa duket në letër.
“Formalisht bëhet fjalë për një huazim me të drejtë blerjeje”, tha Pedullà në një analizë në YouTube, “por ka disa elementë që e komplikojnë historinë.
Për shembull, Bologna kishte hyrë fuqishëm në garë për Asllanin, por Saputo bllokoi gjithçka.
Arsyeja? Lojtari kërkoi një pagë prej 2 milionë eurosh dhe garanci për një vend titullari”.
Kjo kërkesë e mesfushorit shqiptar ka bërë që pista e Bologna-s të mbyllej, ndërsa Torino lëvizi me më shumë vendosmëri duke arritur marrëveshjen me Interin.
Asllani, i cili kërkon të marrë më shumë hapësira dhe të provojë veten si titullar i rregullt, shihet nga drejtuesit e Torinos si një përforcim me perspektivë të madhe.
Megjithatë, mbetet për t’u parë nëse “e drejta e blerjes” do të shndërrohet realisht në detyrim, duke marrë parasysh pritshmëritë e lojtarit dhe investimin financiar që kërkon operacioni.
Një gjë është e sigurt: aventura e re e Asllanit në Serie A është gati të nisë dhe te Torino ai do të ketë mundësinë të tregojë vlerën e tij në fushë.
