Një avion F-15 amerikan është rrëzuar mbi Iran dhe një A-10 në Gjirin Persik, ndërsa Teherani ofron shpërblim të majmë për kapjen e pilotëve të gjallë. Një anëtar i ekuipazhit të F-15 është shpëtuar pas një operacioni dramatik kërkim-shpëtimi, ndërsa kërkimet për pilotin e dytë vazhdojnë në territor armik.
Regjimi iranian ka shpallur zyrtarisht një shpërblim (bounty) për çdo qytetar apo militant që arrin të kapë rob pilotët amerikanë që rrëzohen. Një tjetër avion, i famshmi A-10 “Warthog”, u rrëzua në rajonin e Gjirit pas një defekti apo goditjeje, por piloti i tij u shpëtua shëndoshë e mirë???
Operacioni “Furia Epike” ka pësuar goditjen e parë serioze në ajër. Sipas raporteve të fundit nga Axios dhe NYT, forcat ajrore të SHBA-së kanë humbur dy mjete fluturuese brenda pak orësh. Incidenti më kritik mbetet ai i avionit F-15, i cili u rrëzua thellë brenda territorit iranian. Forcat speciale amerikane arritën të nxjerrin nga zona e rrezikut njërin prej anëtarëve të ekuipazhit, por fati i personit të dytë mbetet i paqartë, duke nxitur një garë kundër kohës përpara se ai të bjerë në duart e forcave iraniane.
Situata është tensionuar edhe më shumë pas thirrjes së Teheranit për “gjueti” ndaj pilotëve. Duke ofruar shpërblime financiare për kapjen e tyre, Irani po tenton të përsërisë skenarët e vjetër të pengjeve për të rritur presionin ndaj Donald Trump. Ky hap shihet si një mjet i luftës psikologjike për të demoralizuar njësitë ajrore që po bombardojnë pa ndalur infrastrukturën iraniane.
Ndërkohë, në rajonin e Gjirit Persik, një avion mbështetës i llojit A-10 “Warthog” u rrëzua në rrethana ende të paqarta. Fatmirësisht, piloti i vetëm i mjetit u shpëtua me sukses nga ekipet e kërkim-shpëtimit detar. Humbja e këtyre dy avionëve tregon se mbrojtja kundërajrore e Iranit, ndonëse e dëmtuar rëndë, mbetet një kërcënim vdekjeprurës për mjetet amerikane që fluturojnë në lartësi të ulëta.
Pentagoni ka rritur intensitetin e vëzhgimit satelitor dhe operacioneve të dronëve për të lokalizuar pilotin e zhdukur të F-15. Ky incident mund të detyrojë Shtëpinë e Bardhë të rishikojë strategjinë e sulmeve ajrore, duke përdorur më shumë raketa me rreze të gjatë dhe më pak fluturime të drejtpërdrejta mbi zonat e nxehta deri në eliminimin e plotë të kërcënimit nga toka.
