Duke u përpjekur të ringjallë një partneritet rajonal në Azinë Qendrore, vizita e Kancelarit Olaf Scholz ishte e motivuar nga gjeopolitika, migracioni – dhe Talibanët.
Vizita e Olaf Scholz-it në Azinë Qendrore nga 15 deri më 17 shtator ishte e vonuar prej kohësh. Kishin kaluar 14 vjet që kur një kancelar gjerman kishte shkelur në Kazakistan – dhe më shumë se dy dekada për Uzbekistanin.
Kredia: Facebook/ Akorda
Scholz-i dukej si një vizitor i vonuar, pasi vizitën e tij e kishin paraprirë liderë të tjerë të njohur europianë: Emmanuel Macron i Francës, Mark Rutte i Holandës, Viktor Orban i Hungarisë dhe presidenti i Këshillit Evropian, Charles Michel – të gjithë kishin qenë në Azinë Qendrore para liderit gjerman.
Megjithatë, ministri i jashtëm dhe presidenti i Gjermanisë kishin përgatitur terrenin me udhëtime në rajon në vitet 2022 dhe 2023. Pikërisht një vit më parë, në Berlin, Scholz-i u bë kreu i parë evropian që vendosi një “partneritet strategjik rajonal” me Azinë Qendrore, duke parashikuar takime të rregullta me pesë liderët rajonalë në formatin e quajtur “C5+Gjermania”.
Takimi i dytë me “C5” (ose “Z5”, siç quhen në Gjermani) shërbeu si momenti i duhur për kreun e ekonomisë më të madhe të Evropës për të vizituar rajonin, i cili ndodhet midis Rusisë, Kinës, Iranit dhe Indisë. Megjithatë, udhëtimi tre-ditor i Scholz-it tregoi angazhimin e pabarabartë të Gjermanisë me pesë vendet, të cilat ndryshojnë në madhësi dhe hapje politike. Në ditën e parë, kancelari udhëtoi në Uzbekistan; në ditën e dytë arriti në Kazakistan. Për Scholz-in, duket se mjaftoi që të takonte tre liderët e tjerë në ditën e tretë, në margjinat e samitit shumëpalësh “Z5” në kryeqytetin kazak, Astana.
Presidenti kazak Tokayev: “Rusia nuk mund të mposhtet”
Gjatë takimeve dypalëshe me kancelarin gjerman Olaf Scholz, presidenti kazak, Kassym-Jomart Tokayev, bëri një deklaratë të fortë lidhur me luftën Rusi-Ukrainë. Sipas administratës presidenciale kazake, Tokayev theksoi se, “në terma ushtarakë, është një fakt se Rusia nuk mund të mposhtet,” duke paralajmëruar për pasojat e rënda që do të kishte një përshkallëzim i mëtejshëm i luftës. Ai shtoi se konflikti mund të çojë në “pasoja të pariparueshme për njerëzimin” dhe për vendet e përfshira direkt.
Tokayev kritikoi indirekt qëndrimin perëndimor duke vënë në dukje se një mundësi për arritjen e një armëpushimi u humb me refuzimin e Marrëveshjes së Stambollit. Ai gjithashtu mbështeti nismën sino-braziliane për zgjidhjen e krizës përmes negociatave, të cilën presidenti ukrainas Volodymyr Zelenskyy e kishte refuzuar më parë.
Ndërsa Scholz dhe qeveria gjermane e konsideruan Rusinë përgjegjëse për vazhdimin e luftës, Tokayev theksoi rëndësinë e marrëdhënieve të ngushta dhe partneritetit strategjik të Kazakistanit me Rusinë, duke mbajtur një pozicion neutral në konflikt.
—
Për më shumë lajme dhe analiza nga bota, ndiqni storm-rks.com.
