Deputetja e LDK-së, Hykmete Bajrami, ka reaguar ashpër pas zhvillimeve në seancën e sotme të Kuvendit, duke e quajtur atë momentin ku, sipas saj, “u pa qartë mashtrimi dhe përbuzja e vullnetit të qytetarëve” nga Albin Kurti dhe Lëvizja Vetëvendosje.
Bajrami ka njoftuar se mungoi në seancë për arsye shëndetësore, por theksoi se ajo që ndodhi sot vetëm e vërtetoi atë që LDK-ja ka paralajmëruar që nga 9 shkurti: se Kurti nuk ka numrat për të formuar qeverinë, pavarësisht deklarimeve të tij të vazhdueshme.
Sipas saj, Kurti i ka humbur Kosovës “muaj e vite” me keqqeverisje, korrupsion, masa ndëshkuese dhe varfërim të qytetarëve, ndërsa sot u dëshmua edhe një herë “mashtrimi i madh” për pretendimet e tij paszgjedhore.
“Thënë troç kjo kastë politike ja humbi Kosovës plotë 5 vjet, por fituan shumë ata dhe rrethi i tyre, fituan nga keqpërdorimi i të gjitha resurseve shtetërore në kurriz të qytetarëve për të cilat një ditë do të japin përgjegjësi”.
Postimi i plotë:
Sot nuk isha në seancën e Kuvendit ku u pa qartë mashtrimi dhe përbuzja e vullnetit të qytetarëve nga ai që doli i pari në zgjedhjet e fundit dhe mori 48 deputetë.
Kam munguar sot në Kuvend për shkaqe shëndetësore, të cilat shpresoj t’i kaloj shpejt.
Po kthehemi te dita e sotme në Kuvend, kur e ku u pa dhe u vërtetua atë që e kemi thënë nga dita e parë pas zgjedhjeve të 9 shkurtit.
U vërtetua mashtrimi i madh i atij që prej shkurtit ka thënë se i ka numrat për të themeluar Qeverinë; të atij që i ka humbur Kosovës muaj e vite me keqqeverisje, korrupsion, masa ndëshkuese, varfërim të qytetarëve dhe ikje nga vendi si zgjidhja e fundit në përballje me të këqijat e përmendura.
S’kam asnjë dyshim: votuesit do ta ndëshkojnë Vetëvendosjen dhe z. Kurti, që mashtruan dhe abuzuan gjatë me besimin e qytetarëve.
Qytetarët do ta ndëshkojnë arrogancën e z. Kurtit, që insistoi dhjetëra herë të votohej një emër i vetëm për kryetare të Parlamentit.
Do ta ndëshkojnë z. Kurti dhe Vetëvendosjen që dështuan të lidhin koalicion me cilëndo parti shqiptare për të shmangur zgjedhjet.
Do ta ndëshkojnë edhe humbjen e 15 ditëve të tjera, pasi dështoj të marrë votat për vete për kryeministër duke dalë me mandatar z. Konjufca për kryeministër ku paraprakisht dihej se po e bënte t’i humbte edhe 15 ditë tjera. E sot na flisnin për humbje të kohës, humbje finanaciare!
Thënë troç kjo kastë politike ja humbi Kosovës plotë 5 vjet, por fituan shumë ata dhe rrethi i tyre, fituan nga keqpërdorimi i të gjitha resurseve shtetërore në kurriz të qytetarëve për të cilat një ditë do të japin përgjegjësi.
Albin Kurti dhe Lëvizja Vetëvendosje do të mbahen mend si pushteti i pazareve dhe korrupsionit në energji, si pushteti që rriti çmimet e çdo produkti bazë, që nuk mbajti asnjë premtim – asnjë të vetëm, që nuk përfundoi asnjë rrugë lokale a rajonale, që rrënoi ekonominë, arsimin dhe shëndetësinë; si pushteti që u përpoq të blinte vota me skema të korrupsionit publik.
Fillimi i fundit politik të Albin Kurtit ka nisur më 9 shkurt. Vula e këtij fundi do të jetë dita e zgjedhjeve të reja.
