Ministri i Shtetit për Marrëdhëniet me Parlamentin, Taulant Balla u takua këtë të martë me deputetin Shaip Kamberi, përfaqësues i shqiptarëve të Luginës së Preshevës në Parlamentin e Serbisë.
Balla dhe Kamberi diskutuan mbi gjendjen aktuale të shqiptarëve në komunat e Preshevës, Bujanovcit dhe Medvegjës, duke theksuar rëndësinë e përmirësimit të kushteve të tyre ekonomike, sociale dhe politike.
Balla nënvizoi mbështetjen e Shqipërisë për kërkesat e shqiptarëve të Luginës së Preshevës, të cilët kërkojnë trajtim të barabartë dhe eleminimin e dallimeve që pengojnë integrimin dhe pjesëmarrjen e tyre efektive në jetën politike dhe shoqërore.
”Kërkesat e popullisë shqiptare të Luginës së Preshevës për eliminimin e dallimeve ekonomike, sociale e politike, të cilat pengojnë integrimin dhe pjesëmarrjen efektive të shqiptarëve në Preshevë, Bujanovc dhe Medvegjë, janë të drejta dhe duhen adresuar në frymën e standardeve europiane”, u shpreh Balla.
”Është shumë i rëndësishëm trajtimi i nevojave të tyre në përputhje me parimet ndërkombëtare të respektimit të pakicave kombëtare”, vijoi Balla, duke përmendur se bashkëpunimi ndërmjet institucioneve dhe përfaqësuesve shqiptarë është i domosdoshëm për avancimin e të drejtave dhe përmirësimin e jetesës në Luginën e Preshevës.
