Banorët në qytetin verior dhe perëndimor të Gazës kanë mbetur të tronditur, nga shkatërrimet e papara pas javësh bombardimesh nga ushtria izraelite.
Për herë të parë pas disa javësh, palestinezët kanë hyrë në zonat Sheikh Radwan, al-Karama dhe Beach Camp, ku kanë gjetur blloqe të tëra banimi të rrafshuara, qindra shtëpi dhe pjesën më të madhe të infrastrukturës së zonës të shkatërruar.
Dhjetëra video që qarkullojnë në mediat sociale tregojnë banorët duke ecur nëpër rrënoja dhe duke filmuar atë që ka mbetur nga lagjet e tyre.
“Kjo është zona e fundit që mund të arrijmë. Ushtria izraelite është ende afër. Shikoni shkallën e shkatërrimit, ata kanë shkatërruar gjithçka”, dëgjohet një banor duke shpjeguar pamjet e para.
Ndërsa disa banorë ishin duke filmuar rrënojat, të tjerë nxituan të ndihmonin ekipet e Mbrojtjes Civile të Hamasit në Gaza për të nxjerrë trupa poshtë rrënojave.
Zëdhënësi Mahmoud Basal i tha BBC-së se tetë trupa u nxorën nga Gaza veriore të premten në mëngjes, ndërsa ekipet e shpëtimit vazhdojnë kërkimet “me mjete shumë të kufizuara” në zona të tjera.
Skena të ngjashme u raportuan në shumë rrethe të braktisura nga forcat izraelite, të cilat kanë filluar të tërhiqen në linjat e dakordësuara sipas kuadrit të armëpushimit të negociuar në Sharm El-Sheikh midis Hamasit dhe Izraelit.
Rreth 700,000 persona të zhvendosur nga Qyteti i Gazës dhe veriu tani po presin me padurim që tërheqja të përfundojë, në mënyrë që të mund të kthehen në atë që ka mbetur nga shtëpitë e tyre.
Alaa Saleh, mësues që iku me gruan dhe gjashtë fëmijët e tij në Khan Younis tri javë më parë, tha se mezi pret të kthehet në veri sapo të hapet rruga bregdetare.
“Shtëpia ime u shkatërrua një vit më parë. Jetoja në një tendë mbi rrënojat dhe do të kthehem dhe do ta ngre përsëri tendën time. Ne thjesht duam të rindërtojmë. Jemi të lodhur duke jetuar në tenda që nuk na mbrojnë as nga vapa e verës dhe as nga i ftohti i dimrit”.
Nga ana tjetër, Komiteti Ndërkombëtar i Kryqit të Kuq ka shprehur gatishmërinë që të ndihmoj “në kthimin e pengjeve dhe të paraburgosurve te familjet e tyre”.
Në një deklaratë, thuhet se ekipet e saj në Gaza, Izrael dhe Bregun Perëndimor, janë “gjithashtu të gatshme të ndihmojnë në kthimin e mbetjeve njerëzore në mënyrë që familjet të mund të vajtojnë të dashurit e tyre me dinjitet”.
“Ata do të sjellin ndihma në Gaza dhe do ta shpërndajnë atë. Ditët në vijim janë kritike. U bëj thirrje palëve t’u përmbahen angazhimeve të tyre”, shkruan presidentja Mirjana Spoljariç, duke thënë se marrëveshja “ofron një shans jetësor për të shpëtuar jetë dhe për të lehtësuar vuajtjet”.
KNKK-ja ka ndihmuar në lehtësimin e shkëmbimeve të mëparshme të pengjeve midis Izraelit dhe Hamasit.
Ndërkaq Tom Fletcher, shef humanitar i OKB-së, tha se ka mbetur në “kontakt të ngushtë” me ekipet e OKB-së në Gaza, si dhe me civilët, të cilët të gjithë kanë “pritur dhe shpresuar gjatë” për këtë moment.
“Na duhet që armët të heshtin dhe duhet që armëpushimi të zbatohet”, tha ai, ndërsa shpjegoi se OKB-ja ka një plan 60-ditor për ndihmë sapo të jetë në gjendje ta zbatojë atë – me objektivin kryesor për të sjellë ushqime me vlera të larta ushqyese.
Rivendosja e sistemit shëndetësor do të jetë gjithashtu një “sfidë masive”, vazhdoi Fletcher, ndërsa theksoi nevojën për të rindërtuar spitalet, për të sjellë anestetikë dhe qetësues dhimbjesh thelbësorë në Gaza, si dhe për ekspertizë mjekësore.
