Analistët paralajmërojnë se pas përfundimit të luftimeve me SHBA-në, Teherani do t’i kthehet Phenianit për të rindërtuar arsenalin e tij të raketave dhe objekteve të pasurimit të uranit.
Pas sulmeve të rënda nga SHBA dhe Izraeli që dëmtuan infrastrukturën ushtarake iraniane, Teherani po kërkon aleatë të vjetër. Analistët thonë se është “shumë e mundshme” që Irani të rikthejë bashkëpunimin me Korenë e Veriut për të siguruar teknologji raketore dhe pasurim urani.
Pheniani ka shprehur hapur mbështetjen për liderin e ri iranian, Mojtaba Khamenei, duke dënuar veprimet e Uashingtonit. Ky afrim diplomatik shihet si një hap drejt një partneriteti të ri ushtarak, ku të dyja vendet shohin SHBA-në si rivalin e tyre kryesor strategjik në botë.
Kim Jong-un së fundmi testoi raketa lundrimi nga luftanijet e reja, një lëvizje që ekspertët e shohin si “marketing” për Iranin. Këto armë moderne, të afta për të shmangur radarët, mund të jenë pjesë e paketës që Koreja e Veriut do t’i ofrojë Teheranit pas luftës.
Historia e tyre e bashkëpunimit daton që nga vitet ’80, kur Pheniani furnizonte Teheranin me raketa Scud. Sot, kjo lidhje mund të zgjerohet në një bashkëpunim trepalësh duke përfshirë edhe Rusinë, duke krijuar një bllok të fuqishëm kundër ndikimit perëndimor në rajon.
Përballë sanksioneve ndërkombëtare, ky shkëmbim “teknologji për energji” është jetik për të dyja regjimet. Ndërsa Irani ka nevojë për rindërtim të shpejtë, Korea e Veriut synon të sigurojë burime si nafta në këmbim të ekspertizës së saj ushtarake të avancuar.
