Bashkimi Evropian ka lëshuar një paralajmërim të prerë: çmimet e naftës dhe gazit nuk do të pësojnë ulje në një të ardhme të afërt, madje edhe nëse lufta me Iranin përfundon menjëherë. Tregjet e ngushta globale dhe presioni mbi furnizimet mbeten sfidat kryesore, ndërsa blloku po përgatit masa emergjente për të mbështetur familjet dhe bizneset.
Komisioneri i BE-së për Energjinë, Dan Jørgensen, deklaroi të martën se çmimet marramendëse në Evropë, të nxitura nga konflikti që përfshin Iranin, nuk do të kthehen në nivele normale edhe nëse paqja shpallet nesër. Sipas tij, megjithëse nuk ka mungesa të menjëhershme të furnizimit në bllokun 27-anëtarësh, presioni mbi karburantin e avionëve dhe naftën, si dhe”„kufizimet në rritje” në tregun e gazit, po mbajnë lart çmimet e energjisë elektrike.
“Ajo që e konsideroj jashtëzakonisht të rëndësishme është të deklaroj sa më qartë që të jetë e mundur: edhe nëse paqja arrihet nesër, ne prapë nuk do të kthehemi në normalitet në të ardhmen e parashikueshme”, tha Jørgensen në një konferencë për shtyp pas takimit të ministrave të energjisë.
Masat mbështetëse dhe faturat e larta Krahu ekzekutiv i BE-së po përgatit një “kuti mjetesh” me masa për të zbutur rritjen prej rreth 70% për gazin dhe 60% për naftën. Që nga fillimi i luftës, fatura e BE-së për lëndët djegëse fosile të importuara është rritur me 14 miliardë euro.
Masat që priten të zbulohen së shpejti përfshijnë:
-
Shkëputjen e çmimit të gazit nga ai i energjisë elektrike.
-
Uljen e taksave të energjisë elektrike (sugjeruar nga Ursula von der Leyen).
-
Mundësinë e një takse të njëhershme mbi “fitimet e papritura” të kompanive energjetike.
Largimi nga varësia ruse Jørgensen theksoi se BE-ja mbetet e palëkundur në ndalimin e blerjeve të gazit rus. Varësia nga ky gaz ka rënë nga 45% para luftës në Ukrainë, në vetëm 10% aktualisht, me synimin për ta çuar në zero përmes importeve nga furnizuesit alternativë si SHBA-ja, Azerbajxhani, Algjeria dhe Kanadaja.
“Nuk duhet të përsërisim kurrë gabimet e së kaluarës duke i lejuar Putinit ta përdorë energjinë si armë dhe shantazh kundër nesh”, përfundoi komisioneri, duke bërë thirrje edhe për zbatimin e planeve për kursimin e energjisë, si puna nga shtëpia dhe ulja e shpejtësisë në autostrada.
