Deputeti i Partisë Demokratike të Kosovës (PDK), Bedri Hamza, gjatë seancës së thirrur për të diskutuar mbi shtrenjtimin e naftës, ka deklaruar se Qeveria nuk po e merr parasysh ndikimin e rëndë që kjo dukuri ka në standardin e jetesës së qytetarëve.
Sipas raportimit të Klankosova.tv, Hamza theksoi se rritja e pakontrolluar e çmimeve po çon drejt varfërimit të popullatës, ndërsa akuzoi ekzekutivin se po injoron zhvillimet dhe indikatorët kryesorë makroekonomikë e financiarë.
“Kjo vazhdon të varfërojë qytetarin e Kosovës. Kemi raportin e fundit të Fondit Monetar Ndërkombëtar (FMN), i cili konfirmon ato që i kemi thënë ne. Rritja ekonomike për vitin 2025 vlerësohet të jetë 3.6%, që është më e ulëta në vitet e fundit. Për më keq, parashikimet për vitin 2026 janë edhe më të zbehta, me një rritje prej vetëm 3.3%”, deklaroi Hamza.
Alarmi për inflacionin dhe rënien e standardit Ish-ministri i Financave u ndal edhe te shifrat e inflacionit, duke shpjeguar se si shtrenjtimi i produkteve po godet direkt xhepin e konsumatorit kosovar.
“Inflacioni, apo thënë në gjuhën popullore, rritja e çmimeve dhe përkeqësimi i standardit të jetesës, ka arritur në 6% në shkurt të këtij viti, krahasuar me shkurtin e vitit paraprak. Kjo do të thotë varfërim i qytetarëve. Prandaj, ne e përkrahim çdo masë që shkon në drejtim të përmirësimit të jetës së qytetarëve të Kosovës”, u shpreh deputeti i PDK-së.
Hamza kërkoi reflektim urgjent nga Qeveria për të ndërmarrë hapa konkretë që zbusin efektet e krizës ekonomike, duke u thirrur në të dhënat zyrtare që parashikojnë një ngadalësim të zhvillimit ekonomik të vendit.
