Kandidati për kryetar të Prishtinës, Bekë Berisha, ka publikuar një fotografi tërheqëse në rrjetet sociale ku shihet me fituesin e Big Brother Albania, Besnik Kelmendi – i njohur si Gjesti. Në përshkrimin e fotos, Berisha shkruan: “Me Gjest lazdranin, djalin e bashkëluftëtarit tim!”
Postimi është pritur me reagime të ndryshme. Ndërsa një pjesë e qytetarëve e kanë parë si një gjest respekti ndaj familjeve të bashkëluftëtarëve, të tjerë e kanë kritikuar si pjesë të një fushate që më shumë bazohet në figurat e njohura sesa në platforma konkrete për kryeqytetin.
Në fotografi, Gjesti dhe një mik i tij shfaqen të buzëqeshur pranë Berishës, i cili është ulur në tavolinë me cigare, kafe dhe një plan të mbështjellë përpara. Të shumtë janë ata që kanë komentuar: A do të kemi një fushatë me përmbajtje dhe objektiva për Prishtinën, apo do të dominojnë “lazdranat” dhe figurat mediatike?
Berisha njihet për stilin e tij të drejtpërdrejtë dhe shpesh jo konvencional në komunikim. Megjithatë, sfidat e Prishtinës kërkojnë më shumë se vetëm imazhe tërheqëse – kërkojnë ide të qarta dhe plane të zbatueshme.
