Zgjedhjet në Shtetet e Bashkuara të Amerikës janë rezultat që Federata Panshqiptare amerikane “Vatra” e ka pritur. Kështu ka deklaruar në “Info Plus”, sekretari i Federatës Panshqiptare amerikane “Vatra”, Pashko Camaj.
Camaj duke komentuar rezultatin e zgjedhjeve në SHBA, ka thënë se ka fituar Amerika, ka fituar demokracia dhe se ka qenë ditë e rëndësishme për gjithë globin.
“Ne kemi shikuar nga prizma se cili president do të jetë më i përshtatshëm për çështjen e shqiptarëve. Sikur elektorati amerikan edhe ne shqiptarët jemi nda disa këndej disa andej sa i përket pikëpamjeve tona, por jemi të bindur se pavarësisht se cili do kishte fituar ne shqiptarët jemi në pozicion të mirë”, ka deklaruar Camaj për RTK.
Sipas tij, me presidentin Trump, Federata është e bindur që do të ketë zhvillim shumë pozitiv.
“Trump do të jetë një energji e re që do të lëviz pak diskutimin për Kosovën në përpunimin final i cili do të jetë i favorshëm për shqiptarët por edhe për gjithë rajonin, prandaj zgjedhja e Trumpit president është shumë e rëndësishme dhe një gjë e mirë ardhur dhe mirëpritur për ne shqiptarët”, ka theksuar ai.
Camaj ka thënë se presidenti Trump është i vetmi politikan në skenën botërore i cili ka mundësi dhe vullnet të marrë hapat e duhur dhe të jetë i vendosur që të marrë vendime të cilat do të kenë përfundim final të cilat kanë mbetur ngërç që disa vite.
“Besoj që Trump dhe administrata e tij do të jetë një fuqi pozitive dhe besoj që kjo do të reflektohet së shpejti, besoj që do të ketë një zgjedhje shumë më të mirë për ne shqiptarët në të ardhmen”, ka theksuar Camaj.
