Presidentja e Kosovës, Vjosa Osmani, ka organizuar pritje me rastin e largimit të saj nga detyra dhe ndër të ftuarat ishte edhe shefja në Detyrë e BE-së në Kosovë, Eva Palatova.

Në një postim të zyrës së BE-së në Kosovë, theksohet se Palatova  pati nderin të merrte pjesë sot në pritjen e Presidentes Vjosa Osmani dhe ta falënderonte atë për bashkëpunimin e saj gjatë viteve.

“Si partneri më i besueshëm i Kosovës, BE mbetet i përkushtuar për të mbështetur Kosovën në rrugën e saj të integrimit në BE”, tha Palatova.

Në segmentin rrugor Pejë-Rugovë, konkretisht në zonën e Kuqishtës, janë rrëshqitur gurë të mëdhenj nga mali, duke rrezikuar seriozisht qarkullimin e automjeteve.

Lëvizja e gurëve ka krijuar pengesa dhe mundësi të rritura për aksidente, veçanërisht për shoferët që nuk e kanë të qartë situatën në terren, ka raportuar mediumi lokal RTV Fontana.

“Rrëzohen gurë të mëdhenj në rrugën Pejë–Rugovë, rrezik për shoferët Në segmentin rrugor Pejë–Rugovë, konkretisht në zonën e Kuqishtës , janë raportuar rrëshqitje të gurëve të mëdhenj nga mali, duke rrezikuar seriozisht qarkullimin e automjeteve. Apelohet për kujdes të shtuar dhe, nëse është e mundur, shmangie të kësaj rruge deri në stabilizimin e situatës”, thuhet në raportim.

Ish-komandanti i Shtabit të Përgjithshëm të UÇK-së, Sylejman Selimi, ka qenë i ftuar në “Frontal” të T7.

Ai është pyetur për pjesëmarrjen e Albin Kurtit në UÇK.

“Albini e ka dhënë kontributin të vet, kohën kur Albinin unë e njoh e kam taku bashkë me Adem Demaçin”, tha mes tjerash Selimi.

Presidentja e vendit, Vjosa Osmani, në Ditën Botërore të Ndërgjegjësimit për Autizmin, theksoi se, sikurse çdo vit, edhe këtë vit janë krah për krah me fëmijët me autizëm dhe familjet e tyre, për më shumë mirëkuptim, mbështetje dhe dashuri për secilin fëmijë.

“Sepse çdo fëmijë meriton të dëgjohet dhe të mbështetet”, ka shkruar Osmani.

Postimi i plotë:

Sikurse çdo vit, edhe sot, jemi krah për krah me fëmijët me autizëm dhe familjet e tyre, për më shumë mirëkuptim, mbështetje dhe dashuri për secilin fëmijë. Sepse çdo fëmijë meriton të dëgjohet dhe të mbështetet. 🫶

Ministria e Industrisë, Ndërmarrësisë, Tregtisë dhe Inovacionit (MINTI) njofton se pas verifikimit të njehsorëve të parë elektrik, pas ankesave të konsumatorëve, ka konstatuar se disa njehsorë kanë qenë me afat të skaduar dhe paraqesin devijime në datë dhe kohë, ndërsa matja e energjisë rezulton e saktë dhe pa ndikim në konsum.

Sipas raportit të komisionit ad hoc të MINTI-t dhe Agjencisë së Metrologjisë së Kosovës, janë evidentuar devijime prej rreth 2–3 ditësh në datë dhe 10–11 orësh në kohë krahasuar me të dhënat reale. Megjithatë, bllombat e njehsorëve janë konstatuar të paprekura dhe pa dëmtime.

MINTI ka njoftuar se do të kërkojë nga Zyra e Rregullatorit të Energjisë (ZRRE) marrjen e masave për devijimet e konstatuara, ndërsa Inspektorati Qendror i Mbikëqyrjes së Tregut (IQMT) do të shqiptojë gjoba ndaj KEDS-it, si pronar dhe shfrytëzues i njehsorëve, për çdo gjetje që lidhet me afatin e skaduar të vlefshmërisë.

Departamenti për Mbrojtjen e Konsumatorit raporton se deri më 30 mars 2026 nuk kishte pranuar ankesa, ndërsa pas formimit të komisionit verifikues, vetëm gjatë dy ditëve të fundit janë pranuar 209 ankesa të reja, të cilat po verifikohen aktualisht.

Ministria apelon tek qytetarët që të parashtrojnë çdo ankesë në adresën konsumatori@rks-gov.net, duke bashkëngjitur numrin e telefonit dhe adresën e banimit, në mënyrë që verifikimi të realizohet sa më shpejt.

MINTI konfirmon përkushtimin e saj për trajtimin e çdo ankese të konsumatorëve dhe ndërmarrjen e masave ligjore bazuar në gjetjet e verifikimit.