Punëtorët e Autoritetit Rajonal të Pellgjeve Lumore (ARPL), institucion ky në kuadër të Ministrisë së Mjedisit dhe Planifikimit Hapësinor (MMPH), nuk i kanë pranuar pagat e muajit paraprak, e as pagën e 13-të, ndryshe nga pjesa tjetër e sektorit publik në vend.

Lidhur me këtë shqetësim, Ministria e Mjedisit dhe Planifikimit Hapësinor, në një përgjigje zyrtare për KlanKosova.tv, ka sqaruar se vonesa ka ndodhur si pasojë e një gabimi teknik nga ana e Ministrisë së Financave, përkatësisht nga Divizioni i Pagave.

MMPH-ja ka kërkuar mirëkuptimin e zyrtarëve të ARPL-së, duke bërë të ditur se kjo çështje do të rregullohet gjatë muajit pasues, pasi procesi i ekzekutimit të pagave për muajin mars 2026 tashmë është përmbyllur.

Ngarkesa e madhe shkaktoi lëshime teknike Sipas Ministrisë, Divizioni i Pagave këtë muaj është përballur me një vëllim të madh pune për shkak të disa proceseve shtesë, siç janë paga e 13-të, kompensimet retroaktive për përvojën e punës, krijimi i ministrive të reja, si dhe bartja dhe sistemimi i nëpunësve.

“Mosrealizimi i pagës së rregullt dhe pagës së 13-të për zyrtarët e ARPL-së ka ndodhur për shkak të një gabimi teknik nga Ministria e Financave, gjegjësisht Divizioni i Pagave, i cili këtë muaj është përballur me shumë procese shtesë. Kjo ka krijuar ngarkesë të madhe në një kohë të shkurtër. Për këtë arsye kanë ndodhur lëshime teknike dhe kërkojmë mirëkuptimin e zyrtarëve të ARPL-së. Kjo do të rregullohet në muajin vijues”, thuhet në njoftimin e MMPH-së.

Zyrtarët e prekur pritet t’i marrin mjetet e tyre bashkë me pagën e radhës, pasi institucionet përkatëse të kenë përditësuar listat e pagesave me korrigjimet e nevojshme.

Një kamion është përfshirë nga flakët gjatë ditës së sotme në aksin rrugor Suharekë-Duhël, në autostradën „Ibrahim Rugova“.

Zëdhënësi i Policisë së Kosovës për rajonin e Prizrenit, Shaqir Bytyqi, bëri të ditur se njoftimi për zjarrin është pranuar rreth orës 12:25. Menjëherë pas marrjes së informatës, në vendngjarje janë dërguar ekipet e zjarrfikësve dhe patrullat policore për të menaxhuar situatën.

„Më datën 08.04.2026, rreth orës 12:25, Policia ka pranuar informatën se një kamion është përfshirë nga zjarri në relacionin Suharekë–Duhël. Radiobaza ka njoftuar Stacionin Policor në Suharekë për të dërguar zjarrfikësit, si dhe një patrullë policore në vendin e ngjarjes. Për incidentin është informuar edhe njësiti patrullues i autostradës“, deklaroi Bytyqi.

Asnjë i lënduar, por ndihmë mjekësore për shkak të stresit Sipas zëdhënësit, megjithëse zjarri ishte i përmasave të konsiderueshme, fatmirësisht nuk ka pasur persona të lënduar. Megjithatë, një qytetare ka kërkuar ndërhyrjen e Urgjencës për shkak të gjendjes emocionale të personave që ndodheshin në kamion.

„Një qytetare ka kërkuar edhe ndihmën e ekipit të urgjencës, pasi ngasësi i kamionit dhe një pasagjer, megjithëse nuk kanë pësuar lëndime, janë në gjendje të shqetësuar“, shtoi zëdhënësi Bytyqi, duke konfirmuar se policia ka orientuar ekipin mjekësor drejt lokacionit.

Mediumi lokal, TV Prizreni, ka publikuar pamje nga vendi i ngjarjes ku shihet se flakët tashmë janë shuar plotësisht nga ekipet e zjarrfikësve. Policia po punon për zbardhjen e shkaqeve që çuan në shpërthimin e zjarrit në mjetin transportues.

Partia Demokratike e Kosovës (PDK) i është drejtuar ushtrueses së detyrës së presidentes, Albulena Haxhiu, me një kërkesë zyrtare për procedimin e emërimit të anëtarit të dytë të kësaj partie në Komisionin Qendror të Zgjedhjeve (KQZ).

Përmes një komunikate për media, bëhet e ditur se në kërkesë theksohet se çështja e përbërjes së KQZ-së ka mbetur e papërfunduar gjatë mandatit të ish-presidentes Vjosa Osmani. Sipas PDK-së, përfaqësimi i tyre me dy anëtarë në këtë institucion nuk është çështje interpretimi politik, por një e drejtë që buron drejtpërdrejt nga dispozitat kushtetuese.

Në letrën e PDK-së, gjithashtu, theksohet rëndësia e respektimit të praktikës së deritanishme institucionale, sipas së cilës kjo parti ka qenë vazhdimisht e përfaqësuar me dy anëtarë. Subjekti opozitar kërkon ruajtjen e parimeve të barazisë dhe balancës mes subjekteve politike në këtë organ rregullator të zgjedhjeve.

Argumentimi Kushtetues Duke iu referuar nenit 139, paragrafi 4 të Kushtetutës së Kosovës, PDK argumenton se shpërndarja e vendeve në KQZ duhet të bazohet në përfaqësimin e grupeve parlamentare në Kuvend.

Në kushtet aktuale, ku funksionojnë katër grupe parlamentare, PDK-ja konsideron se secili grup duhet të ketë nga një përfaqësues në raundin e parë, ndërsa vendet e mbetura duhet të ndahen sipas madhësisë së grupeve. Kjo formë, sipas tyre, siguron përfaqësim proporcional dhe legjitimitet kushtetues brenda KQZ-së.

Kjo kërkesë tashmë është dorëzuar zyrtarisht në zyrën e u.d. presidentes Haxhiu dhe pritet një përgjigje institucionale lidhur me hapat që do të ndërmerren për kompletimin e këtij institucioni.