Kuvendi Zgjedhor i Akademisë së Shkencave dhe Arteve të Kosovës (ASHAK) ka zgjedhur tetë anëtarët e rinj të rregullt dhe katër korrespodentë.

Si anëtarë të rinj të rregullt akademikë u zgjodhën, Bardh Rugova e Shkumbin Munishi nga Seksioni i Gjuhësisë dhe i Letërsisë. Nga Seksioni i Shkencave Shoqërore anëtarë të rregullt u zgjodhën Arsim Bajrami, Besnik Krasniqi e Frashër Demaj.

Nga Seksioni i Shkencave të Natyrës, anëtarë u bënë  Arsim Morina e Salih Gashi. Nga Seksioni i Arteve anëtar u zgjodh, Xhevdet Xhafa.

Ndërkaq, u zgjodhën edhe katër anëtarë korrespondentë.

Muhamet Mala u zgjodh anëtar korrespodent nga Seksioni i Shkencave Shoqërore, nga ai i Shkencave të Natyrës, Enver Hamiti, ndërkaq dy anëtarë korrespodent u zgjodhën nga Seksioni i Arteve, Ismet Jonuzi e Zake Prelvukaj.

Aleanca për Ardhmërinë e Kosovës (AAK), përmes Departamentit për Ujë dhe Politika Mjedisore, ka propozuar krijimin e një Bordi të Përbashkët Profesional për të gjitha Kompanitë Rajonale të Ujësjellësit (KRU).

Përmes një komunikate për media, AAK ka thënë se ky hap përfaqëson një qasje të re dhe më të integruar për të adresuar sfidat aktuale në menaxhimin e burimeve ujore.

“Ky hap përfaqëson një qasje të re dhe më të integruar për të adresuar sfidat aktuale në menaxhimin e burimeve ujore, duke ofruar një alternativë më efektive dhe të qëndrueshme krahasuar me modelin aktual me shtatë borde të pavarura”, thuhet mes tjerash në komunikatë.

Komunikata e plotë:

Një Bord i Përbashkët Profesional: Zgjidhja për Sfidat e Menaxhimit të KRU-ve në Kosovë

Në përpjekje për të përmirësuar cilësinë dhe qëndrueshmërinë e sektorit të ujit në Kosovë, Aleanca për Ardhmërin e Kosovës përmes Departamentit për Ujë dhe Politika Mjedisore ka propozuar krijimin e një Bordi të Përbashkët Profesional për të gjitha Kompanitë Rajonale të Ujësjellësit (KRU). Ky hap përfaqëson një qasje të re dhe më të integruar për të adresuar sfidat aktuale në menaxhimin e burimeve ujore, duke ofruar një alternativë më efektive dhe të qëndrueshme krahasuar me modelin aktual me shtatë borde të pavarura.

Nevoja dhe arsyeshmëria e krijimit të bordit të përbashkët

Aktualisht, secila nga shtatë KRU-të në Kosovë operon me një bord të pavarur, shpesh të përbërë nga individë me përvojë të kufizuar në sektorin e ujit dhe menaxhimin strategjik. Kjo qasje ka rezultuar në:

• Mosarritjen e objektivave kryesore të performancës: Problemet e vazhdueshme që kanë shoqëruar KRU-të kanë ndikuar në dështimin për të arritur rezultate të qëndrueshme dhe për të përmbushur pritshmëritë e qytetarëve dhe institucioneve mbikëqyrëse.
• Fragmentim të politikave dhe strategjive: Mungesa e një qasjeje të unifikuar ka çuar në zgjidhje të izoluara, shpesh të paefektshme dhe me kosto të larta, për të adresuar sfidat e përbashkëta që prekin të gjitha rajonet.
• Vendimmarrje të paefektshme dhe të fragmentuar: Strategjitë dhe investimet shpesh dublohen ose mungon koordinimi i duhur, duke rezultuar në një shpërndarje të pabarabartë të burimeve dhe ulje të cilësisë së shërbimeve ndaj qytetarëve.
• Kosto të larta administrative: Funksionimi i shtatë bordeve të pavarura krijon shtatë struktura të veçanta administrative, gjë që rrit ndjeshëm shpenzimet operative dhe ul efikasitetin në menaxhimin e burimeve.

Përballë këtyre sfidave, krijimi i një bordi të përbashkët profesional ofron një zgjidhje të mirëorganizuar dhe të bazuar në praktikat më të mira. Ky model jo vetëm që do të ndihmojë në tejkalimin e fragmentimit dhe dobësive aktuale, por gjithashtu do të sigurojë një përdorim më efikas dhe të drejtë të burimeve financiare dhe njerëzore, duke garantuar përmirësime të prekshme në sektorin e ujit.

Benefitet e një bordi të përbashkët profesional

1. Reduktimi i kostove ekonomike

Krahasuar me modelin aktual me shtatë borde të pavarura, krijimi i një strukture të përbashkët do të reduktojë ndjeshëm shpenzimet administrative. Kjo nismë do të thjeshtojë proceset dhe do të kursejë fonde që mund të ridrejtohen për përmirësimin e shërbimeve dhe realizimin e projekteve infrastrukturore.

2. Përmirësimi i koordinimit dhe harmonizimi i politikave

Një bord i përbashkët do të mundësojë unifikimin e strategjive dhe standardizimin e praktikave më të mira në sektorin e ujit. Kjo do të sjellë vendimmarrje të centralizuar dhe të shpejtë për çështje që prekin të gjitha KRU-të, si furnizimi me ujë, trajtimi i ujërave të ndotura dhe investimet në infrastrukturë.

3. Efikasitet më i lartë në menaxhimin e burimeve

Një bord i përbashkët do të hartojë dhe zbatojë një plan të unifikuar për investime strategjike, duke siguruar që projektet prioritare, si ndërtimi i akumulacioneve të reja të ujit dhe modernizimi i impianteve të trajtimit të ujit, të marrin mbështetjen e nevojshme financiare dhe logjistike.

4. Rritja e kapaciteteve profesionale

Me një strukturë të unifikuar, të gjitha KRU-të do të përfitojnë nga trajnime dhe programe zhvillimi profesional të standardizuara. Kjo do të sigurojë që stafi teknik dhe menaxherial të ketë aftësitë e duhura për të përmbushur sfidat e sektorit, duke promovuar teknologji dhe praktika moderne.

5. Transparencë dhe llogaridhënie më e madhe

Një bord i përbashkët do të krijojë një mekanizëm të centralizuar për monitorimin e performancës së KRU-ve, duke forcuar mbikëqyrjen nga Autoriteti Rregullator i Ujësjellësve dhe Kanalizimeve (ARRU) dhe institucionet e tjera përkatëse. Kjo do të sigurojë përdorimin më të efektshëm të burimeve financiare dhe raportim të saktë e të aksesueshëm.

Hapat e domosdoshëm për implementim

Për të realizuar këtë reformë, është e nevojshme të amendohen ligjet aktuale për ndërmarrjet publike dhe sektorin e ujit. Legjislacioni i ri duhet të:

• Sigurojë përbërje profesionale dhe të paanshme për bordin e përbashkët, me ekspertë të fushës.
• Garantojë autonominë dhe pavarësinë nga ndikimet politike për të ruajtur integritetin e vendimmarrjes.
• Promovojë qasje të integruar dhe afatgjatë për zhvillimin e sektorit të ujit.

Krijimi i një bordi të përbashkët profesional është një domosdoshmëri për të adresuar sfidat e sektorit të ujit në Kosovë. Kjo qasje do të përmirësojë cilësinë e shërbimeve ndaj qytetarëve, do të promovojë zhvillim ekonomik dhe do të sigurojë menaxhim më të mirë të burimeve ujore për të gjitha rajonet e vendit.

Departamenti për Ujë dhe Politika Mjedisore

Drejtues të Lidhjes Demokratike të Kosovës në 35 vjetorin e themelimit të kësaj partie kanë bërë homazhe te varri i ish-presidentit, Ibrahim Rugova.

Kryetari i LDK-së, Lumir Abdixhiku ka shkruar se LDK nisi si aspiratë e popullit të Kosovës për liri, gjersa programi politik i saj, u shndërrua në projekt kombëtar të popullit të Kosovës.

“Ky projekt kulmoj me shtetin tonë, Republikën tonë. Ibrahim Rugova ishte dhe mbetet arkitekti i shtetit tonë, prijësi historik i lëvizjes për liri, pavarësi dhe demokraci. Ai ishte njeriu që u qëndroi sfidave më të vështira të kohës me mençurinë, vizionin dhe qëndrueshmërinë që i karakterizojnë njerëzit e mëdhenj. Veprat e tij jetësore janë gurët themeltarë të Republikës sonë – një trashëgimi që na frymëzon dhe na udhëheq çdo ditë – ndërsa emri i tij është vlerë e patjetërsueshme e historisë së Kosovës. LDK sot, me gjithë trashëgimtarët politik e idelogjik të rugovizmit, e ndjenë peshën e madhe historike të ndryshimit të domosdoshëm për realizimin në plotni të projektit tonë identitar të nisur 35 vite më parë. Kosova, shtet i pavarur e sovran, i anëtarësuar në NATO e BE, e me miqësi të përheshme me SHBA-të; ishte misioni ynë dje, është misioni ynë sot dhe padyshim do të jetë dhe misioni ynë nesër”, ka shkruar ai.