Deputeti i Lidhjes Demokratike të Kosovës, Anton Quni ka adresuar akuza ndaj qeverisë që sipas tij, nuk ka arritur ta planifikojë përfundimin e kontratës së furnizimit me ushqim në mënyrë të duhur.

Para deputetëve të opozitës, të cilët ishin në sallë të pranishëm, ai ka deklaruar se me kontraktorin e mëparshëm, Ministria e Mbrojtjes kishte lidhur një kontratë të ngjashme urgjente mbi 3 herë, për periudha deri në gjashtë muaj, me një vlerë mbi 7 milionë euro, duke u bazuar në procedura të shpallura ekstreme emergjente.

Sipas tij, kjo situatë ka krijuar paqartësi dhe pasiguri dhe ka reflektuar negativisht mbi kredibilitetin e institucionit më të besueshëm në Kosovë.

“Kjo jo vetëm që rrezikon shëndetin e ushtarëve tanë, por përfshin pasoja strategjike lidhur me aftësinë tonë për të përmbushur detyrimet ndërkombëtare dhe për të mbrojtur sigurinë kombëtare. Absolutisht e papranueshme që një procedurë kaq e rëndësishme si ushqimi për ushtrinë tonë të shpërfaqë shkelje elementare, ky njëherë procedura klasifikohet si sekrete dhe pastaj si procedurë esktreme emergjente, në kundërshtim me legjislacionin dhe praktiva të shteteve demokratike. Ligji për prokurimin publik saktëson qartë se klasifikimet lejohen vetëm në raste të jashtëzakonshme ku kërkohet siguri kombëtare. Ushqimi nuk përbën asnjë nga këto raste, dhe mund të planifikohen në mënyrë efektive…Përjashtimi duhet të jetë vetëm kur FSK angazhohet në vende ndërkombëtare. Ushqimi nuk është emergjencë e papritur, është diçka që mund të planifikohet me kalendar e transparencë”.

Deputeti i PDK-së, Hisen Berisha ka akuzuar ekzekutivin që sipas tij përmes Ministrisë së Mbrojtjes po synon sabotimin e FSK-së si institucionin kyç për sigurinë dhe stabilitetin e vendit.

Berisha tha se ushtarët e FSK-së, janë denigruar nën qeverinë e Kurtit.

Ai e implikoi në këtë situatë edhe komandanten supreme të FSK-së, presidenten Vjosa Osmani.

“Komandanti i FSK-së paralajmëroi suspendimin e të gjitha aktiviteteve ushtarake në forcë, diçka që duhet shqyrtuar në hierarki deri te komandanti suprem, i cili fatkeqësisht është pjesë e këtij komploti kundër Forcës. Çështja e ushqimit për ushtarët e FSK-së është një sinjal i qartë i problemeve të menaxhimit dhe mungesës së përgatitjes afatgjate. Tani e kanë kuptuar se ashtu siç ishte ashtu siç nuk ishte i aplikueshëm koncepti i shërbimit të detyrueshëm ushtarak edhe ideja e ngritjes së kapaciteteve të vet-qëndrueshmërisë për ushqim është një ide që do të konprementojë FSK-në”, deklaroi Berisha.

Deputeti Berisha përmendi edhe keqmenaxhimet, të cilat siç tha po bëjnë që ushtari i FSK-së të vendos të largohet nga ushtria.

“E vërteta është se asnjë ushtarë se ka lënë uniformën për shkak të ushqimit apo bashkimit familjarë, trillime që janë thënë në media. Janë një mori shkaqesh demotivuese tjera, siç pagat dhe kushtet jodinjitoze, manipulimet me gradime jomeritore, trajnimet jashtë vendit po ashtu me manipulime, pastaj puna jashtë orarit, moskompensimi, mungesa e transportit dhe të tjera…Kjo qeveri ka agjendë për zhbërjen e shtetit të Kosovës, duke stërkequr edhe procesin politik dhe funksionalitetin institucional të saj deri te segmenti i fundit që janë Forcat e Armatosura të Kosovës”, theksoi Berisha.

Në seancën e jashtëzakonshme të Kuvendit të Kosovës të thirrur nga opozita rreth krizës së furnizimit me ushqim, deputeti i Aleancës për Ardhmërinë e Kosovës, Bekë Berisha, e ka quajtur gjendje alarmante dhe emergjente zgjidhjen e saj.

“Pyetja që ne duhet ta shtrojmë si mund të jemi të sigurtë se kjo mazhoranca e zbaton planin 10 vjeçar të transformimit të FSK-së në ushtri me standardet e NATO-s nëse nuk arrijnë të menaxhojë as ushqimin për ushtarët tonë. Nëse e quani veten qeveri, këto gjëra s’duhet të lejojnë të ndodhin, besa nuk kanë ndodhur kurrë. Nuk ka lojë me ushtri”, ka thënë Berisha.

Grupi Parlamentar i Lëvizjes Vetëvendosje, në një konferencë për medie, ka bërë të ditur se nuk marrin pjesë në seancën e jashtëzakonshme të ftuar nga opozita ku do të diskutohet në lidhje me ushqimin për FSK-në.

Deputeti i kësaj partie, Enver Dugolli, ka thënë se raportimet e opozitës për këtë çështje janë dezinformata e se ushtria e Kosovës nuk është dhe nuk do të mbetet pa bukë.

Tutje, Dugolli ka shtuar se kërkesa e opozitës për dorëheqje të shefes së Grupit Parlamentar të VV-së, Mimoza Kusrai Lila, është shantazh dhe VV nuk pranon atë.

“Qëllimi i kësaj konference është qartësimi i pozicionit tonë si mazhorancë për seancën e jashtëzakonshme të thirrur nga opozita. Veprimet e tyre kësaj here shkojnë përtej shantazhit, duke kërkuar dorëheqjen e shefes e grupit parlamentar, Mimoza Kusari Lila, për të marrë pjesëmarrje në seancë, është absurde dhe nuk e pranojmë. Ne nuk marrim pjesë në as një seancë që vjen nga ta”.

“Arsyeja e dytë që është me praktike, në fillim të tetorit të këtij vit me kërkesën e opozitës të gjithë anëtarët e Komisionit për siguri e përkrahem kërkesën e tyre që të ftojmë ministrin Ejup Maqedonci, për këtë çështje. Me shumë se tri orë diskutim dhe ministri u përgjigj për çështjen e ushqimit dhe të tjerat. Është një seri dezinfomatave që dëshirojnë ta keqinformojnë qytetarin”, ka thënë ai.

Kurse, deputeti Mefail Bajqinofci, ka thënë se Ministri e Mbrojtjes nuk i ka dhënë kontratë kompanisë “Beni Dona” e se kjo ka qenë propogandë.

“Është bërë propagandë e jashtëzakonshme. E vërteta është kjo, MB nuk i ka dhënë kontrate kompanisë ‘Beni Dona’ kompani që për shumë 10 vite ka krijuar monopol. Kjo komani ka fituar miliona euro, së dyti MB nuk ka shpallur kontratë sekrete por kontratë emergjente. MB ka ndarë kontratat në dy lote, një për Beni Dona, dhe dy tjera për kompani të tjera që të krijohet konkurrencë. Kompania në fjalë, Beni Dona, ka bërë ankesë për të krijuar monopol. Nuk ka pasur dhe nuk do të këtë ngecje në furnizim, të gjitha janë shpifje deri më sot”, ka thënë ai, raporton EO.