Lëvizja Vetëvendosje (LVV) ka shprehur mbështetjen e saj për protestën që do të mbahet të premten, më 17 tetor, në Tiranë, në përkrahje të ish-krerëve të Ushtrisë Çlirimtare të Kosovës (UÇK).

Në komunikatën e saj, Vetëvendosje thotë se qëndron në krah të të gjithë qytetarëve që protestojnë, por përsërit qëndrimin e saj duke kujtuar se “Gjykata Speciale nuk erdhi vetvetiu, por nisi që në vitin 2008 nga një rezolutë e propozuar në Këshillin e Evropës nga kryesuesi i deputetëve të Federatës Ruse, Konstantin Kosachev, por që u miratua si rezolutë me propozim të senatorit Dick Marty në vitin 2011”.

Vetëvendosjes thekson se lufta e Ushtrisë Çlirimtare të Kosovës ka qenë e drejtë dhe e domosdoshme”, ndërsa pretendimi i Prokurorisë se brenda UÇK-së ka ekzistuar një grup kriminal është i pasaktë dhe i padrejtë.

“UÇK-ja nuk ka qenë ndërmarrje kriminale dhe nuk ka pasur struktura të tilla. Përkundrazi, për krime të luftës duhet të gjykohet Serbia, ajo është shkaktarja e gjenocidit dhe krimeve masive e sistematike ndaj popullit të Kosovës,” thuhet mes tjerash në reagim.

Komunikata e plotë:

Lëvizja VETËVENDOSJE! qëndron në krah të të gjithë qytetarëve që protestojnë e kërkojnë drejtësi për ish-krerët e Ushtrisë Çlirimtare të Kosovës në Tiranë. Qëndrimi ynë për Gjykatën Speciale mbetet i pandryshuar.

Kujtojmë se Gjykata Speciale nuk erdhi vetvetiu, por nisi që në vitin 2008 nga një rezolutë e propozuar në Këshillin e Evropës nga kryesuesi i deputetëve të Federatës Ruse në Asamblenë Parlamentare të Këshillit të Evropës, Konstantin Kosachev, por që u miratua si rezolutë me propozim të senatorit Dick Marty në vitin 2011.

Lufta e Ushtrisë Çlirimtare të Kosovës ka qenë e drejtë dhe e domosdoshme. Në anën tjetër, pretendimi i Prokurorisë se brenda UÇK-së ka ekzistuar një grup kriminal është i pasaktë dhe i padrejtë. UÇK-ja nuk ka qenë ndërmarrje kriminale dhe nuk ka pasur struktura të tilla. Përkundrazi, për krime të luftës duhet të gjykohet Serbia, ajo është shkaktarja e gjenocidit dhe krimeve masive e sistematike ndaj popullit të Kosovës.

Mirëpo, për ecjen tonë të sinqertë përpara si shtet e si komb duhet me patjetër të reflektojmë mbi qëndrimet tona karshi kësaj Gjykate në kohën kur u themelua. Reflektimi nuk është gabim, por në këtë drejtim shumë nga ata që sot dalin në kundërshtim me Gjykatën Speciale, dje ishin lobuesit më të mëdhenj për themelimin e saj. Para se të protestojnë, këta aktorë dhe politikanë duhet të tregojnë të paktën një minimum pendese për qëndrimet e tyre të gabuara në të kaluarën. Një shembull i qartë është vet Kryeministri aktual i Shqipërisë, Edi Rama, i cili madje kishte ardhur në Kosovë në vizitë emergjente me helikopter për të bindur palët këtu që të votonin pro themelimit të kësaj Gjykate.

Por, Lëvizja VETËVENDOSJE!, si atëherë më 2015, si sot më 2025, është e palëkundur se drejtësia duhet të ndriçojë të vërtetën dhe e vërteta nuk ka si të jetë ndryshe veçse në anën e luftës dhe përpjekjes së paepur të popullit të Kosovës për çlirim e pavarësi sikur popujt e tjerë.

Në anën tjetër, institucionet e Shqipërisë si shtet anëtar i OKB-së, i Këshillit të Evropës, i OSBE-së, i NATO-s e shumë pranë Bashkimit Evropian, kanë përgjegjësi dhe mundësi që këtë çështje ta ngrejnë në këto forume ndërkombëtare, aty ku flitet e vendoset për drejtësi, e jo në sheshin “Skënderbe” në Tiranë.

Po ashtu shtetet mike të Kosovës që tashmë gëzojnë anëtarësi në këto organizata, duhet të bëjnë shumë më tepër për të mbrojtur të vërtetën e luftës sonë dhe për të çuar përpara drejtësinë. Njëjtë siç duhet bërë më shumë në këto forume për njohjen e gjenocidit dhe gjykimin e krimeve kundër njerëzimit, krimeve të luftës që Serbia i ka kryer në Kosovë e në mbarë Ballkanin.

Jack Smith, ish-prokurori i Prokurorisë Speciale të Hagës që ngriti aktakuzën ndaj ish-krerëve të Ushtrisë Çlirimtare të Kosovës (UÇK), ka folur për procesin gjyqësor në Hagë. Ai ka deklaruar se raste të mëdha si ky marrin vite për t’u ndjekur penalisht.

Smith ka folur edhe për praninë e kamerave në sallën e gjyqit, duke theksuar se në raste të tilla, dëshmitarët mund të sillen ndryshe.

“Rasti i fundit që pata në Dhomat e Specializuara të Kosovës përfshinte krime lufte në Kosovë. Përpjekjet për t’i sjellë këto raste në gjykatë ishin pothuajse të pamundura për shkak të kërcënimeve ndaj dëshmitarëve”, ka theksuar ai.

Sipas tij, një nga rastet është ende në zhvillim.

“Këto raste transmetoheshin drejtpërdrejt (live-stream), por identiteti i disa dëshmitarëve ishte plotësisht i mbrojtur. Unë e mbështes transparencën, nuk më pëlqen kjo mënyrë, por nuk mund të vë jetët e dëshmitarëve në rrezik”, ka deklaruar Smith.

Smith ka qenë përgjegjës për ngritjen e aktakuzës ndaj ish-krerëve të UÇK-së në Gjykatën Speciale në Hagë, të cilët akuzohen për krime lufte dhe krime kundër njerëzimit, akuza që të gjithë i kanë hedhur poshtë.