Storm/OKB: Presidenti Joe Biden mbajti fjalimin e tij të fundit në Asamblenë e Përgjithshme të Kombeve të Bashkuara, ku mbrojti trashëgiminë e tij politike dhe diskutoi vendimin e tij të vështirë për të mos kandiduar për një mandat të dytë.
Në fjalën e tij, Biden gjithashtu i drejtoi një paralajmërim të ashpër Lindjes së Mesme, duke theksuar rrezikun e një lufte më të gjerë në rajon, si dhe për nevojën e vazhdimit të mbështetjes për Ukrainën.
Biden përmendi vendimin e tij për t’u tërhequr nga gara presidenciale, duke thënë: “Këtë verë, u përballa me vendimin nëse do të kërkoja një mandat të dytë si president. Ishte një vendim i vështirë. Të qenit president ka qenë nderi i jetës sime, por pas 50 vjetësh në shërbimin publik, është koha për një brez të ri që të udhëheqë kombin tonë.”
Në një mesazh të drejtpërdrejtë për liderët botërorë, përfshirë Presidentin ukrainas Volodymyr Zelensky dhe Kryeministrin kanadez Justin Trudeau, Biden theksoi se liderët duhet të vënë interesat e popullit të tyre përpara qëndrimit në pushtet. “Populli është më i rëndësishëm se sa pushteti,” tha ai. Fjalimi u prit me duartrokitje të zgjatura.
Biden nisi fjalën e tij prej 25 minutash duke mbrojtur veprimet e tij në tërheqjen e SHBA nga Afganistani, ku humbën jetën 13 amerikanë, dhe foli për përpjekjet globale për të rimëkëmbur pas pandemisë COVID-19. Ai reflektoi mbi përvojën e tij si shërbyes publik, duke përmendur ngjarje si lufta në Vietnam dhe sulmet e 11 Shtatorit.
Presidenti më pas e ktheu vëmendjen tek e ardhmja, duke bërë thirrje për paqe në Lindjen e Mesme. “Tani është koha që palët të përfundojnë termat e marrëveshjes, të kthejnë pengjet në shtëpi dhe të sigurojnë paqen për Izraelin dhe Gazën,” tha ai. Biden paralajmëroi për rrezikun e një lufte më të gjerë, pasi Izraeli intensifikoi sulmet ajrore në Liban, duke vrarë gati 500 persona dhe plagosur mbi 1,600 të tjerë.
Izraeli deklaroi se po sulmonte objektiva të lidhur me grupin Hezbollah, i cili ka nisur raketa drejt Izraelit. Biden u shpreh: “Detyra jonë është të sigurojmë që forcat që na bashkojnë të jenë më të forta se ato që na ndajnë.” Ai nënvizoi se bota ndodhet në një pikë kthese dhe se zgjedhjet që do të bëhen sot do të përcaktojnë të ardhmen për dekadat e ardhshme.
Në fjalën e tij, Biden gjithashtu përsëriti mbështetjen e tij për Ukrainën, duke deklaruar se “Putin ka dështuar në qëllimin e tij kryesor” për ta nënshtruar Ukrainën. Biden i bëri thirrje komunitetit ndërkombëtar që të mos heqë dorë nga mbështetja për Ukrainën, pasi kjo çështje është vendimtare për të ardhmen globale. Ai paralajmëroi gjithashtu kundër fuqive autoritare dhe përdorimit të inteligjencës artificiale si mjet për shtypje.
Ndërkohë që garat presidenciale në SHBA po afrohen, Biden dhe nënpresidentja Kamala Harris do të mbajnë takime të veçanta me Presidentin Zelensky në Shtëpinë e Bardhë. Një seancë e Këshillit të Sigurimit të OKB-së mbi Ukrainën është planifikuar për të martën, ku pritet që Zelensky të paraqesë një propozim të ri për paqe dhe një apel për mbështetje të mëtejshme ushtarake për të goditur objektivat ruse.
Përfundimisht, Biden paralajmëroi kundër diktatorëve, duke theksuar se përdorimi i teknologjisë së avancuar duhet të shërbejë për fuqizimin e njerëzve të zakonshëm, jo për të forcuar zinxhirët e diktatorëve.
