Presidentja e Kosovës, Vjosa Osmani, ka pranuar në Lubjanë Çmimin “Women for Peace and Security” nga Asambleja Parlamentare e NATO-s.

Në fjalimin e saj, ajo e cilësoi këtë çmim si një nder të veçantë, të cilin e pranoi në emër të popullit të Kosovës dhe sidomos të grave të vendit që, siç tha ajo, “kanë udhëhequr rezistencën paqësore, kanë luftuar për liri dhe kanë ndërtuar paqen”.

Në fjalimin e saj para delegatëve të Asamblesë, presidentja Osmani theksoi se ky çmim ka një domethënie të veçantë, sepse “rruga e Kosovës drejt lirisë dhe paqes është ndërtuar bashkërisht nga burrat dhe gratë e saj”.

Ajo përkujtoi kontributin e grave të Kosovës gjatë periudhës së rezistencës paqësore, gjatë luftës dhe në ndërtimin e institucioneve të pasluftës, duke theksuar se “gratë e Kosovës udhëhoqën rezistencën, luftuan për liri, ndezën qirinjtë e paqes dhe frymuan jetë në institucionet e reja me dhembshuri, vendosmëri dhe guxim”.

“E pranoj këtë çmim në emër të grave të Kosovës, nënave dhe bijave që ende presin drejtësi për të dashurit e tyre, dhe të vajzave të reja që udhëheqin me vizion për një Kosovë ku barazia nuk është ëndërr e largët, por përpjekje e përditshme,” tha Osmani.

Në fjalimin e saj, presidentja kujtoi momentin kur aeroplanët e parë të NATO-s fluturonin mbi qytetet e Kosovës, duke e përshkruar atë si “tingullin e shpresës që po kthehej”, dhe si simbolin më të fuqishëm të paqes. “Atëherë mësuam një të vërtetë që do të na përcaktojë gjithmonë: edhe kombet e vogla mund të mbajnë të vërtetat më të mëdha të botës, se liria nuk njeh madhësi, dhe guximi nuk ka gjini”, u shpreh ajo.

Osmani shprehu mirënjohje të thellë për rolin vendimtar të NATO-s në çlirimin dhe ruajtjen e paqes në Kosovë, duke theksuar se “NATO nuk është thjesht një fortesë force, por një simbol i paqes, një forcë për të mirë dhe një shembull i gjallë i asaj që kombet mund të arrijnë kur bashkohen në mbrojtje të vlerave”.

Ajo theksoi gjithashtu përparimin e Kosovës në fushën e demokracisë, sundimit të ligjit dhe sigurisë, duke nënvizuar se vendi renditet ndër më të sigurtat në Evropë dhe botë. “Ky është rezultati i vlerave që kemi zgjedhur, lirisë, demokracisë dhe drejtësisë”, tha Presidentja.

Në pjesën qendrore të fjalimit, Osmani theksoi rëndësinë e përfshirjes së grave në vendimmarrje:

“Paqja pa gratë është e paplotë, siguria pa gratë në tryezë është e paqëndrueshme dhe demokracia pa gratë është një punë e papërfunduar”.

Ajo rikujtoi se Kosova e ka vendosur Agjendën “Gratë, Paqja dhe Siguria” në zemër të zhvillimit kombëtar, jo si politikë të rastësishme, por si “bindje ndërgjegjeje”. Presidentja përmendi Forumin Ndërkombëtar për Gratë, Paqen dhe Sigurinë, që mbahet çdo vit në Prishtinë, si dhe themelimin e Qendrës Rajonale të Ekselencës për Gratë, Paqen dhe Sigurinë, e vetmja e këtij lloji në Evropë, e cila funksionon nën patronazhin e Presidencës.

“Kjo qendër lidh organizatat e drejtuara nga gratë me partnerë ndërkombëtarë për të forcuar përfshirjen dhe për të amplifikuar zërat e tyre në ndërtimin e paqes,” tha Osmani.

Presidentja u ndal edhe te sfidat e mbetura, duke theksuar se dhuna me bazë gjinore, diskriminimi dhe pabarazia vazhdojnë të prekin shoqëritë në mbarë botën. “Kundër këtij realiteti duhet të veprojmë së bashku, gra e burra, me përkushtim të palëkundur për drejtësi,” tha ajo, duke theksuar rëndësinë e fuqizimit ekonomik, arsimor dhe politik të grave.

Në vijim, presidentja Osmani solli mesazhin se historia e Kosovës është mishërim i agjendës “Gratë, Paqja dhe Siguria”, pasi gratë kanë qenë thelbësore në çdo fazë të historisë, nga lufta e deri te ndërtimi i institucioneve. Ajo theksoi se guximi i grave të mbijetuara të luftës është “ndërgjegjja e kombit tonë” dhe se si Presidente, ka bërë mision të saj që gratë të kenë vend në çdo tryezë vendimmarrjeje.

Në fund të fjalimit, Osmani theksoi se historia e Kosovës është një mesazh për botën: “Paqja nuk është e përhershme nëse nuk ndahet. Dhe historia na mëson: mos i qetësoni diktatorët, mos i lejoni autokratët të forcohen, sepse çdo herë që tolerohen, viktima janë të pafajshmit – sidomos gratë dhe fëmijët”.

Ajo bëri thirrje për unitet të demokracive përballë agresionit dhe dezinformimit, duke thënë se “aleancat e ndërtuara mbi vlera mund të shpëtojnë jetë” dhe se “bashkimi i kombeve të lira është gjithmonë më i fortë se aleancat e diktatorëve”.

“Kur gratë dhe burrat udhëheqin krah për krah, kombet janë më të forta. Kur kombet bashkohen, paqja zgjat. Kur paqja zgjat, njerëzimi triumfon”, tha në mbyllje presidentja e Kosovës, duke falënderuar Asamblenë Parlamentare të NATO-s dhe aleatët që vazhdojnë të mbështesin Kosovën drejt anëtarësimit të plotë në familjen euroatlantike.

“Ky çmim do të qëndrojë në Zyrën e Presidentit të Republikës së Kosovës, por çdo ditë do të frymëzojë një popull të tërë,”, përfundoi Osmani, duke shtuar se synimi i përbashkët duhet të jetë “një shekull i drejtësisë, shpresës dhe barazisë, ku liria nuk ka kufij dhe guximi nuk ka gjini”.