Dhomat e Specializuara të Kosovës, në koordinim me Komisionin Qendror të Zgjedhjeve i kanë ndërmarrë të gjitha veprimet e nevojshme për t’ua lejuar të paraburgosurve në Hagë që të votojnë në zgjedhjet lokale, pra për të ushtruar të drejtën e tyre qytetare.

Kështu ka deklaruar në një përgjigje për Klankosova, zëdhënësi i DhSK-së, Michael Doyle.

“Në koordinim me Komisionin Qendror të Zgjedhjeve, KSK-ja ka ndërmarrë të gjitha hapat brenda fushëveprimit të autoritetit të saj në mënyrë që të gjithë të paraburgosurit në Qendrat e Paraburgimit të KSK-së që dëshirojnë ta bëjnë këtë, të mund të ushtrojnë të drejtën e tyre qytetare si qytetarë të Kosovës për të votuar në zgjedhje”, thuhet në përgjigjen e Doyle.

Megjithatë, ai për arsye të privatësisë, nuk bëri të ditur nëse e kanë shfrytëzuar të drejtën e tyre të votës, ish-presidenti Hashim Thaçi, Kadri Veseli, Jakup Krasniqi, Rexhep Selimi dhe të tjerët.

Sipas rezultateve preliminare të Komisionit Qendror të Zgjedhjeve (KQZ), zgjedhjet lokale të 12 tetorit 2025 kanë sjellë një garë të ngushtë mes partive kryesore në vend, duke paralajmëruar një raund të dytë zgjedhjesh mjaft të hapur më 9 nëntor.

Lëvizja Vetëvendosje (VV), Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK) do të përballen në një numër të madh komunash, ndërsa rezultati final do të përcaktohet pikërisht në balotazh.

LVV ka siguruar fitoren pa balotazh në tri komuna: Kamenicë, Podujevë dhe Shtime.

Në 12 komuna të tjera pritet të garojë në raundin e dytë: Gjakovë (kundër AAK), Gjilan (kundër LDK), Fushë Kosovë (kundër LDK), Mitrovicë (kundër PDK), Kaçanik (kundër PDK), Obiliq (kundër LDK), Rahovec (kundër AAK), Pejë (kundër LDK), Prishtinë (kundër LDK), Prizren (kundër PDK), Viti (kundër LDK) dhe Vushtrri (kundër PDK).

Në tri komuna Vetëvendosje prin, ndërsa në nëntë të tjera renditet e dyta, duke ruajtur potencial për rritje në raundin e dytë.

PDK ka fituar po ashtu tri komuna pa balotazh: Skenderaj, Ferizaj dhe Hani i Elezit, ndërsa në gjashtë komuna të tjera do të përballet në raundin e dytë: Dragash (kundër LDK), Kaçanik (kundër VV), Klinë (kundër AAK), Mitrovicë (kundër VV), Prizren (kundër VV) dhe Vushtrri (kundër VV).

Në katër prej tyre PDK prin, ndërsa në dy të tjera renditet e dyta.

LDK ka arritur fitore në dy komuna në raundin e parë – Istog dhe Lipjan – dhe do të marrë pjesë në nëntë balotazhe: Gjilan, Fushë Kosovë, Obiliq, Pejë, Prishtinë, Viti (të gjitha kundër VV-së), si dhe Dragash (kundër PDK), Suharekë dhe Junik (kundër AAK).

Në gjashtë prej këtyre komunave LDK është në epërsi, ndërsa në tri të tjera është e dyta, duke u renditur si një nga partitë me performancën më të qëndrueshme në këtë proces zgjedhor.

AAK ka siguruar fitoren pa balotazh në Deçan, ndërsa do të përballet në pesë komuna të tjera: Gjakovë, Rahovec (të dyja kundër VV-së), Klinë (kundër PDK), Suharekë dhe Junik (kundër LDK).

Ndërkohë, Nisma Socialdemokrate ka ruajtur komunën e Malishevës, ku ka fituar pa balotazh, ndërsa në komunat tjera nuk ka arritur rezultate të dukshme.

Kandidati i pavarur Ramiz Lladrovci ka fituar pa balotazh në Drenas.

Në komunat me shumicë serbe, Lista Serbe ka siguruar fitore në nëntë komuna, kryesisht në veri të vendit, ndërsa në Kllokot do të garojë në balotazh.

Garë e fortë po zhvillohet për kryeqytetin. Këtë e dëshmojnë edhe rezultatet e publikuara nga Komisioni Qendror i Zgjedhjeve (KQZ).

Sipas KQZ-së, dallimi mes Përparim Ramës së LDK-së dhe Hajrulla Çekos së LVV-së, aktualisht është veç 730 vota.

Rama ka marrë 34 mijë e 752 vota, kurse Çeko i ka 34 mijë e 22 vota.

Aktualisht janë të numëruara 98.88 përqind e votave, apo kanë mbetur veç edhe tri kuti pa u numëruar.

Meqë asnjëri nga kandidatët nuk ka arritur të sigurojë mbi 50% të votave, Rama dhe Çeku do të përballen në balotazh më 9 nëntor, për të vendosur se kush do ta udhëheqë Prishtinën për katër vitet e ardhshme.

Mitrovica ka përjetuar një nga garat më të ngushta zgjedhore për kryetar komune në zgjedhjet e mbajtura dje.

Rezultatet paraprake tregojnë një duel të fortë mes kandidatit të Partisë Demokratike të Kosovës (PDK), Arian Tahiri, dhe atij të Lëvizjes Vetëvendosje (LVV), Faton Peci.

Sipas të dhënave, Arian Tahiri ka siguruar 47.89% të votave (15,368 vota), ndërsa Faton Peci është shumë pranë me 47.80% (15,340 vota) – një diferencë prej vetëm 28 votash mes dy kandidatëve.

Kandidatët e tjerë në garë ishin:

Gëzim Plakolli nga LDK me 3.57% (1,146 vota)

Qazim Nimani nga AAK me 0.74% (237 vota)

Mitrovica përfundimisht do të shkojë në balotazh, sipas rezultateve të Komisionit Qendror të Zgjedhjeve.