Votues në Skenderaj shkruan “Ramiz Lladrovci” në fletëvotim – mesazh simbolik për Sami Lushtakun?

Skenderaj, 12 Tetor 2025 – Një skenë e pazakontë është shfaqur gjatë procesit zgjedhor në komunën e Skenderajt, ku një votues ka vendosur të shprehë preferencën e tij politike në një mënyrë joformale: në vend që të votojë për ndonjërin nga kandidatët e listës zyrtare, ai ka shënuar me dorë emrin Ramiz Lladrovci, aktualisht kandidat për rizgjedhje në komunën fqinje të Drenasit.

Në fletëvotimin e fotografuar, shihet se nuk është shënuar asnjë kandidat nga lista për Skenderaj, por në fund është shkruar me laps blu: “Ramiz Lladrovci”, së bashku me një shenjë të kutisë së votimit.

Ky veprim simbolik vjen në një moment ku në Skenderaj garon ish-komandanti dhe politikani i njohur Sami Lushtaku, dikur mik i ngushtë dhe bashkëpunëtor i Lladrovcit, si në kohë lufte ashtu edhe në periudhën e pasluftës, kur të dy ishin figura të rëndësishme brenda Partisë Demokratike të Kosovës (PDK).

Lladrovci, i cili këtë herë garon si kandidat i pavarur përmes Iniciativës Qytetare për Drenasin, duket se ka përfituar nga një valë simpatish që shkon përtej kufijve të komunës së tij, të paktën në nivel simbolik.

Fotografia është shpërndarë gjerësisht në rrjete sociale dhe ka ngjallur reagime të shumta, si nga përkrahësit e Lladrovcit, ashtu edhe nga ata të Lushtakut.

Ndonëse kjo “votë” nuk do të ketë efekt juridik, ajo është një mesazh i qartë për ndasitë dhe rivalitetet që kanë lindur brenda PDK-së pas ndarjes së rrugëve politike të dy ish-bashkëluftëtarëve.

Të shtëna me armë janë regjistruar sot para një qendre votimi në fshatin Komoran të komunës së Drenasit, duke krijuar shqetësim në mesin e qytetarëve në ditën e votimeve.

Burime të KosovaPress kanë konfirmuar se njësitë policore kanë dalë menjëherë në vendin e ngjarjes. Fatmirësisht, nuk raportohet për persona të lënduar si pasojë e këtij incidenti.

Ndërkohë, një dëshmitar okular ka mohuar që incidenti të ketë ndonjë lidhje me procesin zgjedhor. Sipas tij, përplasja ndodhi për shkak të një konflikti të mëhershëm mes dy të rinjve. Fillimisht ata janë përleshur fizikisht, dhe më pas njëri prej tyre ka qëlluar me armë zjarri katër herë.

Policia është duke hetuar rrethanat e incidentit, ndërsa pritet një komunikatë zyrtare për më shumë detaje mbi rastin. Autoritetet kanë bërë thirrje për qetësi dhe respektim të rendit publik gjatë procesit zgjedhor.

Kryetari i Komunës së Prishtinës, njëherit edhe kandidat i LDK-së për kryetar të kësaj komune, Përparim Rama, ka ushtuar të drejtën e votës.

Ai pas votimit fillimisht uroj për fitoren e Shqipërisë që mposhti mbrëmë Serbinë, pikërisht në Serbi, duke lidhur kështu me një fitore të kryeqytetit.

“Urime për fitoren e Shqipërisë dje, një fitore historike, monumentale. Uroj që edhe sot të fitojë kryeqyteti, të fitojë zhvillimi i vendit tonë, të fitojë bashkëpunimi i ndërsjellë nga të gjithë, një unifikim, një zgjidhje e përbashkët për të ardhmen tonë, për të ardhmen e fëmijëve tanë. Po ashtu, në të njëjtën kohë uroj që fitorja të jetë e atyre që bashkëpunojnë me miqtë tanë ndërkombëtarë, që i çojnë proceset përpara me një vizion të mirëfilltë për të ardhmen tonë”, tha Rama.

Deputeti i Lëvizjes Vetëvendosje (LVV), Glauk Konjufca, ka ushtruar të drejtën e votës.

Pas votimit, ai iu ka bërë thirrje qytetarëve në çdo komunë që të dalin e të votojnë, pasi vetëm kështu mund t’i bëjmë komunat tona më mirë.

Konjufca tutje ka uruara që zgjedhjet e sotme të shkojnë mbarë siç i ka hije Kosovës.

”Sot po mbahen zgjedhjet lokale ne Republikën e Kosovës dhe unë sapo votova. Ju bëj thirrje qytetarëve në çdo komunë – dilni e votoni. Vetëm përmes demokracisë mund t’i bëjmë komunat tona më të mira. Kështu mund të kërkojmë llogari pastaj për katër vitet e ardhshme. Uroj që zgjedhjet e sotme të shkojnë mbarë ashtu siç i ka hije Kosovës. U zgjedhshin ata që janë më mirët!”, ka shkruar Konjufca.

Kryetari i Lidhjes Demokratike të Kosovës (LDK), Lumir Abdixhiku, ka hedhur votën e tij. Ai ishte i shoqëruar nga bashkëshortja dhe vajzat e tij.

Ndërsa, para mediave ai tha se LDK mbështet çdo vendim të Policisë e Prokurorisë.

“Gjithmonë kanë qenë, janë dhe do të jenë festë [zgjedhjet]. Le të urojmë, të punojmë dhe të shpresojmë që Kosova të jetë sërish shembull i zgjedhjeve demokratike”, tha Abdixhiku.

“LDK-ja dhe unë shprehim mbështetjen dhe besimin e plotë në organet e rendit, prandaj çdo vendimmarrje e tyre do të jetë në përputhshmëri me ligjin dhe Kushtetutën e Kosovës”, tha tutje ai.

Presidentja e Kosovës, Vjosa Osmani, bashkë me bashkëshortin Prindon Sadriu, kanë votuar pak më parë.

“Sot është një ditë e rëndësishme për demokracinë e vendit tonë”, tha ajo.

Osmani i ka uruar suksese të gjithë atyre që po marrin pjesë në zgjedhje.

Ajo ka thënë se shpreson që vota të mbrohet me çdo kusht.

Osmani i ka ftuar qytetarët që të dalin të votojnë.