Kryetari i Lidhjes Demokratike të Kosovës (LDK), Lumir Abdixhiku, ka hedhur votën e tij. Ai ishte i shoqëruar nga bashkëshortja dhe vajzat e tij.

Ndërsa, para mediave ai tha se LDK mbështet çdo vendim të Policisë e Prokurorisë.

“Gjithmonë kanë qenë, janë dhe do të jenë festë [zgjedhjet]. Le të urojmë, të punojmë dhe të shpresojmë që Kosova të jetë sërish shembull i zgjedhjeve demokratike”, tha Abdixhiku.

“LDK-ja dhe unë shprehim mbështetjen dhe besimin e plotë në organet e rendit, prandaj çdo vendimmarrje e tyre do të jetë në përputhshmëri me ligjin dhe Kushtetutën e Kosovës”, tha tutje ai.

Presidentja e Kosovës, Vjosa Osmani, bashkë me bashkëshortin Prindon Sadriu, kanë votuar pak më parë.

“Sot është një ditë e rëndësishme për demokracinë e vendit tonë”, tha ajo.

Osmani i ka uruar suksese të gjithë atyre që po marrin pjesë në zgjedhje.

Ajo ka thënë se shpreson që vota të mbrohet me çdo kusht.

Osmani i ka ftuar qytetarët që të dalin të votojnë.

Kryetari i Partisë Demokratike të Kosovës (PDK), Memli Krasniqi, ka ushtruar të drejtën e tij të votës sot në Prishtinë, i shoqëruar nga bashkëshortja e tij.

Pasi hodhi votën, Krasniqi tha se “sapo votuam, jo vetëm për të kryer një obligim qytetar, por edhe për të dhënë drejtimin që Prishtina e meriton.”

Ai u bëri thirrje qytetarëve që të dalin në mënyrë masive në votime: “Unë i ftoj të gjithë qytetarët e Prishtinës, e gjithë Kosovës, që të votojnë masivisht – sepse katër vite janë me të vërtetë shumë, dhe verdikti i tyre duhet të jetë ai që vendos për të ardhmen e tyre, për një jetë më të mirë.”

Kryeministri në detyrë i Kosovës, Albin Kurti, ka votuar pak më parë.

“Sot është një ditë shumë e rëndësishme, votojmë për të vendosur për katër vitet e ardhshme”, tha ai.

Kurti i ka bërë thirrje qytetarëve që të dalin të votojnë.

“Gëzuar”, tha ai.

Kryetari i AAK-së, Ramush Haradinaj, ka votuar sot në Gllogjan, për zgjedhjet lokale. Ai tha se ka kryer obligimin e tij qytetar.

Haradinaj, në një postim në “Facebook”, ka thënë se është ndjenjë e veçantë të votojë në vendlindje, aty ku ka votua edhe babai i tij.

“Sot e kreva obligimin tim qytetar, bashkë me nanën Ruke, Suzanën, Antigonën dhe pjesë të familjes në Gllogjan. Anita e Gjini votojnë në Prishtinë. Është ndjenjë e veçantë me votu në vendlindje, aty ku ka votu edhe babai im. Kuvendet Komunale dhe kryetarët kanë shumë rëndësi. Vendosni dhe votoni”, ka shkruar Haradinaj.