Kandidati për deputet i Partisë Demokratike të Kosovës (PDK), Abelard Tahiri, ka bërë të ditur se ka zhvilluar një bisedë telefonike me ish-Presidentin e Kosovës, Hashim Thaçi, nga Haga, duke e cilësuar atë si një moment gjithmonë emocional.

Tahiri ka theksuar se gjatë bisedës e ka njoftuar Presidentin Thaçi se nesër zëri i shqiptarëve do të dëgjohet fuqishëm në Shkup, në mbështetje të kërkesës për drejtësi dhe liri për çlirimtarët.

“Gjithmonë emocionuese me bisedu me Presidentin Thaçi. Në bisedën telefonike që pata sot me të, e njoftova se nesër zëri i shqiptarëve do të dëgjohet fuqishëm në Shkup, sepse kur kërkohet drejtësi, nuk ka kufij,” ka shkruar Tahiri.

Postimi i plotë:

Gjithmonë emocionuese me bisedu me Presidentin Thaçi. Në bisedën telefonike që pata sot me të, e njoftova se nesër zëri i shqiptarëve do të dëgjohet fuqishëm në Shkup, sepse kur kërkohet drejtësi, nuk ka kufij. Drejtësi dhe liri për çlirimtarët, për ata që i dhanë liri këtij vendi dhe dinjitet këtij populli!🇦🇱

Jehona Lushaku, e LDK-së, tha se kryetari i Lëvizjes Vetëvendosje (LVV), Albin Kurti, mbrëmë në paraqitjen e tij televizive “e hoqi maskën”.

Ajo tha se ai gjatë intervistës që dha Kurti në Kanal 10 mbrojti të gjithë të akuzuarit e partisë së tij e njëkohësisht sulmoi prokurorinë, gjyqësorin e shtetin e së drejtës.

Lushaku tha se kjo shpërfaq “frikë nga drejtësia” dhe se ai do pushtet pa kontroll ku partia është mbi ligjin.

Postimi i plotë:

ALBINI PA MASKË

Mbrëmë, Albin Kurti e hoqi maskën.

Në televizion pas disa vite mungesë, me plot zell, i mbrojti të gjithë të akuzuarit e partisë së tij.

Jo drejtësinë. Jo ligjin.

Por, njerëzit e Vetëvendosjes që po hetohen për korrupsion.

Në të njëjtën kohë, sulmoi Prokurorinë.

Sulmoi gjyqësorin.

Sulmoi shtetin e së drejtës.

Kjo s’është mbrojtje e pafajësisë.

Kjo është frikë nga drejtësia.

Ky është presion politik.

Ky është mentalitet autoritar.

Çka të presim më shumë nga një kryeministër që vetë nuk i përgjigjet drejtësisë?

Që refuzon thirrjet e gjykatave?

Që sillet sikur ligji vlen për të tjerët, jo për të?

Albin Kurti nuk do shtet të së drejtës.

Ai do pushtet pa kontroll.

Pushtet ku partia është mbi ligjin.

Ku kryeministri sillet sikur është vetë shteti.

Kosova nuk guxon ta pranojë këtë.

Kushtetuta e ligjet duhet të vlejnë për të gjithë edhe për pushtetin.

Presidentja e Kosovës, Vjosa Osmani, ka udhëtuar për në Selinë e Shenjtë në Vatikan.

Sipas njoftimit të lëshuar nga Presidenca e Republikës së Kosovës, Osmani, së bashku me Zotërinë e Parë, Prindon Sadriu, do të priten në audiencë nga Papa Leo XIV në Pallatin Apostolik.

“Po ashtu, Presidentja do të zhvillojë takim me Sekretarin e Shtetit të Vatikanit, Kardinalin Pietro Parolin”, thuhet në njoftim.

Gjatë vizitës në Vatikan, Presidenca njofton se Osmani do të vizitojë edhe Bazilikën e Shën Pjetrit.

Njoftimi i plotë:

Presidentja Osmani udhëton zyrtarisht për në Selinë e Shenjtë, pritet në audiencë nga Papa Leo XIV

Presidentja e Republikës së Kosovës, Vjosa Osmani, ka udhëtuar për në Selinë e Shenjtë, ku do të zhvillojë një sërë takimesh.

Presidentja Osmani, së bashku me Zotërinë e Parë, z. Prindon Sadriu, do të priten në audiencë nga Papa Leo XIV në Pallatin Apostolik. Po ashtu, Presidentja do të zhvillojë takim me Sekretarin e Shtetit të Vatikanit, Kardinalin Pietro Parolin.

Gjatë vizitës në Vatikan, Presidentja Osmani do të vizitojë edhe Bazilikën e Shën Pjetrit.

Në selinë e Misionit të Posaçëm të Republikës së Kosovës në Selinë e Shenjtë, ndërkaq, Presidentja Osmani do të organizojë një pritje të fundvitit me përfaqësues të Selisë së Shenjtë, përfaqësues diplomatik dhe personalitete të tjera. Gjatë kësaj vizite ajo do të realizojë edhe një sërë aktivitetesh të tjera me qëllim të thellimit të raporteve ndërmjet Republikës së Kosovës dhe Selisë së Shenjtë.

Faton Peci e ka bërë betimin e tij të parë si kryetar i Komunës së Mitrovicës së Jugut.

Ai tashmë edhe zyrtarisht ka marrë postin e kryetarit të komunës së Mitrovicës së Jugut.

Peci betohet sot si kryetar i Mitrovicës së Jugut

Kryetari i Prishtinës, Përparim Rama, i ka dhënë mbështetje protestës që do të mbahet në Shkup në mbrojtje të ish-krerëve të UÇK-së që po gjykohen nga Gjykata Speciale në Hagë.

“Pas Prishtinës dhe Tiranës, edhe Shkupi ngre zërin për drejtësi. Kjo është një thirrje për unitet, respekt dhe mbrojtje të vlerave që na bashkojnë si popull. Shpreh mbështetjen time për të gjithë shqiptarët e Shkupit dhe të gjitha trevave që nesër protestojnë në mënyrë paqësore, në mbrojtje të UÇK-së, si vlerë e patjetërsueshme kombëtare. Si kryetar i kryeqytetit të Republikës së Kosovës, do të jem gjithmonë krah bashkëkombësve të mi. Forca jonë si popull qëndron te uniteti, respekti dhe mirënjohja”, ka shkruar Rama.

Shkupi, Prishtina është me ju, shtoi ai.

Kategoritë e dala nga lufta e UÇK-së kanë paralajmëruar protestë më më 13 dhjetor në Shkup, duke thënë se ajo do të jetë “protestë paqësore, qytetare dhe gjithëpërfshirëse, e organizuar në mbrojtje të dinjitetit tonë dhe në kundërshtim të padrejtësive në Hagë”.