Kryetari i Partisë Demokratike të Kosovës, Bedri Hamza, ka takuar ambasadorin gjerman, Rainer Rudolph, duke i uruar mirëseardhje në Kosovë, dhe duke e njoftuar për përgatitjet për zgjedhjet e ardhshme.

Në postimin e tij, Hamza ka njoftuar edhe se në takim, ai ka theksuar se nga partnerët ndërkombëtarë pret përkrahje në skenën ndërkombëtare, si për heqjen e sanksioneve të BE-së, mbështetjen për anëtarësimin në Këshillin e Evropës dhe marrjen e statusit të vendit kandidat për BE.

Postimi i plotë:

Ambasadorit të ri gjerman, Rainer Rudolph, i urova mirëseardhje në Kosovë dhe e njoftova për përgatitjet për zgjedhjet e ardhshme, si dhe për gatishmërinë time për t’i formuar institucionet e reja sa më shpejt.

Në takimin tonë theksova se nga partnerët ndërkombëtarë presim përkrahje në skenën ndërkombëtare, me heqjen e sanksioneve të BE-së, mbështetjen për anëtarësimin në Këshillin e Evropës dhe marrjen e statusit të vendit kandidat për BE.

Kosova ka vetëm një drejtim përpara: rrugën euroatlantike.

Kryetari i AAK-së, Ramush Haradinaj, e ka pritur në selinë e partisë së tij të Ngarkuarën me Punë në Ambasadën Amerikane në Prishtinë, Anu Prattipatin.

Ai tha se diskutuan për zhvillimet politike, zgjedhjet e ardhshme dhe “urgjencën e formimit të institucioneve”.

“Sot, në selinë e Aleancës, me bashkëpunëtorë, pata kënaqësinë të pres të Ngarkuarën me Punë në Ambasadën Amerikane në Prishtinë, znj. Anu Prattipati, e shoqëruar nga Këshilltarja për Çështje Politiko-Ekonomike, znj. Amy Reichert. Diskutuam mbi zhvillimet politike, zgjedhjet e ardhshme të 28 dhjetorit dhe urgjencën e formimit të institucioneve që dalin prej tyre në afatin sa më të shkurtër, kjo si parakusht për ta kthyer normalitetin në vend dhe perspektivën integruese euro-atlantike”, shkroi Haradinaj në një postim në “Facebook”.

Presidenca ka lëshuar një njoftim për takimin mes presidentes Osmani dhe Raportuesit Evropian për Kosovën, Riho Terras. Ata kanë diskutuar për zhvillimet e fundit politike në vend.

Osmani i ka thënë se zgjedhjet lokale u zhvilluan në mënyrë të lirë, të qetë dhe demokratike dhe se transferimi i pushtetit u bë në mënyrë paqësore.

“Presidentja e Republikës së Kosovës, Vjosa Osmani, priti sot në takim raportuesin për Kosovën në Parlamentin Evropian, Z. Riho Terras. Në takim u diskutua për zhvillimet e fundit politike në vend, m ç`rast Presidentja Osmani theksoi se zgjedhjet lokale u zhvilluan në mënyrë plotësisht të lirë, të qetë dhe demokratike dhe se transferimi i pushtetit u bë në mënyrë paqësore.”

Osmani ka thënë se “vazhdimi i masave të BE-së ndaj Kosovës mbetet i pashpjegueshëm, i padrejtë dhe i paarsyeshëm”.

Ajo ka kërkuar mbështetjen e Terras për heqjen e masave.

“Në këtë kontekst, Presidentja Osmani kërkoi mbështetjen e z. Terras për heqjen sa më të shpejtë të këtyre masave, duke rikujtuar se ato dëmtojnë qytetarët dhe minojnë besimin në procesin e integrimit, teksa Kosova ka përmbushur çdo kërkesë të paraqitur nga partnerët evropianë. Sipas Presidentes Osmani, heqja e masave do të ishte një sinjal i fuqishëm për qytetarët dhe një mesazh inkurajues për vazhdimin e reformave.”

Osmani ka shtuar se kërkesa e Kosovës për anëtarësim në BE duhet të procedohet sa më parë dhe anëtarësimi të bëhet në bazë të meritave.

“Gjatë takimit, Presidentja prezantoi një sërë të dhënash të institucioneve ndërkombëtare që e pozicionojnë Kosovën në majat e performancës në shumë fusha kyçe.”

Orav e pret në Prishtinë raportuesin e BE-së për Kosovën, Riho Terras