Një fotografi e qarkulluar në rrjetet sociale ka hapur debat mbi mënyrën si paraqitet Kosova në tekstet shkollore të Gjeografisë në Maqedoninë e Veriut.

Sipas imazhit të publikuar nga analistja Nafie Selmani, në këta libra Kosova shihet si pjesë e Serbisë, sepse qnë fjalinë e parë hyrëse shkruan se gjendet në jugperëndim të Serbisë dhe jo që kufizohet ashtu siç është shkruar për Shqipërinë dhe Maqedoninë e Veriut si vende në kufi.

Po ashtu, më pastaj ajo identifikohet me emërtimin “Metohi”, një term që Serbia e përdor tradicionalisht me ngarkesë politike dhe fetare, duke e trajtuar si pjesë të saj.

Reagimi i plotë i Nafie Selmanit:

A është për burrat e VLEN-it Kosova – Kosovë, apo “Metohia”, ashtu siç figuron në librin e Gjeografisë për klasën e shtatë, botim i vitit 2025?

Dhe a është i njoftuar për këtë emërtim mbështetësi i tyre më i madh politik, kryeministri i Kosovës, ai që shquhej për deklarata nacionaliste? A pajtohet edhe ai që Kosova qenka “Metohi”?

A nuk u vjen pak turp burrave të VLEN-it që nuk arrijnë të mbrojnë as gjënë më elementare të identitetit tonë kombëtar? Apo, sipas zakonit, fajin e   ka sërish Ali Ahmeti, Taravari, ai, ata, unë…të gjithë vetëm ata nuk kanë faj?

Sa herë duhet t’ju poshtërojnë ata juve, pastaj ju neve, pastaj prapë ata juve, vetëm për atë kockë të vogël pushteti që ua kanë hedhur në sofrën e pushtetit?

A keni të paktën një grimcë guximi politik për të kërkuar tërheqjen e këtij botimi skandaloz, e të provoni se vërtet ekzistoni pak përtej rolit dekorativ në qeveri?”.

Vetëm pak ditë para zgjedhjeve të parakohshme parlamentare të 28 dhjetorit, ish-kryetari i LDK-së, Isa Mustafa, komentoi listat zgjedhore të partive politike, duke theksuar se një pjesë të madhe të kandidatëve nuk i njeh fare.

Ai tha se përgjegjësia për përzgjedhjen e tyre u takon ekskluzivisht partive, ndërsa vetë nuk ka dashur të hyjë në komente për emrat e rinj që po garojnë.

“Listat për deputet nuk mund t’i komentoj, sepse një numër të madh të kandidatëve nuk i njoh. Sigurisht se i njohin ose do duhej t’i njohin subjektet që i kanë propozuar”, tha ai në një prononcim për Indeksonline.

Mustafa ndërkohë pret që zgjedhjet të prodhojnë ndryshime të dukshme, sidomos pas periudhës së gjatë të bllokadës politike. Ai e sheh votën e qytetarëve si një mundësi për stabilizimin e institucioneve dhe për një orientim të ri zhvillimor për vendin.

“Ndryshime në rezultate, pas gati një vit bllokade, do duhej të ketë. Ndryshimet i shoh si reflektim të nevojshëm të qytetarëve me të drejtë vote, për ta stabilizuar vendin dhe për ta vënë në binarë normalë të zhvillimit ekonomik, arsimor, shëndetësor dhe integrimit euroatlantik, në këtë kohë kur ka ndryshime globale shumë dinamike”, theksoi ai.

Sipas Mustafës, Kosova ka nevojë të rikthehet në normalitet në të gjitha sektorët, veçanërisht në këtë periudhë me zhvillime të shpejta ndërkombëtare.

Kryetari i AAK-së, Ramush Haradinaj, ka thënë se diaspora ka qëndruar gjithmonë krah për krah me Kosovën.

Tutje, ai ka shtuar se “diaspora dhe Kosova janë një, të pandashme”.

Postimi i plotë:

Diaspora ka qëndruar gjithmonë krah për krah me Kosovën!

Në kohën e rezistencës paqësore, ata ishin hambari i Kosovës, mbështetja jonë ekonomike dhe morale.

Gjatë luftës, diaspora ishte aktivisht e angazhuar, duke u bërë pjesë e përbërëse e luftës për liri dhe logjistikës së UÇK-së.

Vëllezërit dhe motrat nga diaspora ishin zëri ynë në botë për të treguar vuajtjet dhe padrejtësitë ndaj Kosovës.

Pas luftës, diaspora ka qenë bashkë me ne, në çdo hap të rindërtimit dhe zhvillimit të vendit.

Diaspora dhe Kosova janë NJË, të pandashme!

Nënkryetarja e Lidhjes Demokratike të Kosovës (LDK), Hykmete Bajrami, ka thënë se në ditën e parë të qeverisjes së tyre, do t’i bëjnë publike “të gjitha të dhënat për çdo projekt në Kosovë”.

Ajo shkroi në një postim në Facebook se “çdo projekt do të jetë i hapur për publikun dhe çdo vonesë do të shoqërohet me emra, përgjegjësi dhe llogaridhënie pa marrë parasysh emrat”.

“Do të kërkojmë llogari nga secili kontraktor që nuk i ka respektuar afatet, por po aq edhe nga çdo zyrtar shtetëror që me neglizhencë, keqmenaxhim apo heshtje ka lejuar bllokimin e projekteve. Askush nuk do të fshihet më pas procedurave dhe askush nuk do të mbetet pa përgjegjësi. Projektet publike janë para të qytetarëve dhe duhet të përfundojnë me kohë, me cilësi dhe me standard!”, shkroi mes tjerash Bajrami.

Postimi i plotë:

Në ditën e parë të Qeverisë së re të LDK-së do t’i bëjmë publike të gjitha të dhënat për çdo projekt në Kosovë që nga momenti i nisjes, afati i planifikuar për përfundim, deri te çdo ditë vonesë e shkaktuar gjatë zbatimit.

Çdo projekt do të jetë i hapur për publikun dhe çdo vonesë do të shoqërohet me emra, përgjegjësi dhe llogaridhënie pa marrë parasysh emrat!

Do të kërkojmë llogari nga secili kontraktor që nuk i ka respektuar afatet, por po aq edhe nga çdo zyrtar shtetëror që me neglizhencë, keqmenaxhim apo heshtje ka lejuar bllokimin e projekteve.

Askush nuk do të fshihet më pas procedurave dhe askush nuk do të mbetet pa përgjegjësi.

Projektet publike janë para të qytetarëve dhe duhet të përfundojnë me kohë, me cilësi dhe me standard!

Sa i përket rrugëve për Gjilan, Podujevë, Mitrovicë, Pejë dhe Tetovë,  qytetarët e dinë shumë mirë çfarë ka ndodhur gjatë këtyre pesë viteve: premtime, vonesa, plane të papërfunduara dhe punë të lëna përgjysmë.

E njëjta situatë ka ndodhur edhe me stadiumet dhe shumë objekte të tjera publike –

projekte të zvarritura, buxhete të shpenzuara pa rezultat dhe asnjë përgjegjësi.

Kjo praktikë e keqqeversjes, e punëve të lëna përgjysmë merr fund!

Me Qeverinë e LDK-së fillon llogaridhënia reale dhe përfundon koha e justifikimeve dhe ankesave!