Hykmete Bajrami, nga Lidhja Demokratike e Kosovës (LDK), ka shpërndarë një sekuencë nga emisioni Rubikon, ku ajo thotë se Kurti dhe Vuçiq janë në sinkron me njëri-tjetrin, sa herë iu bie popullariteti njërit ose tjetrit’.

“Kur për 5 vjet qeverisje e ke maru veç urën e Saradranit, normal që e bon temë Serbinë dhe tjerët i shpallë tradhtarë”, është mbishkrimi i videos që ka shpërndarë Bajrami ku ajo veç tjerash thotë:

“I kemi pa në sinkron vendimet e Albin Kurtit, sa herë i është dashur popullaritet Vuciqit në Serbi e ka sulmu Albin Kurtin dhe sa herë i ka ra popullariteti Albin Kurtit në Kosovë, serbët në Serbi e kanë bërë këtë” – thotë Bajrami.

Ish-ministri i jashtëm, Enver Hoxhaj, ka dhënë një paralajmërim në një intervistë, duke thënë se Bashkimi Evropian, i cili ende mbahet peng nga pesë shtete që nuk e njohin Kosovën dhe që ato vende ndjekin linja pro-ruse, nuk mund të ketë rol efektiv në dialogun mes Kosovës dhe Serbisë.

Sipas tij, ajo që ka ndodhur në vitin 2025 mund të përsëritet në një version edhe më të errët në vitin 2026.

“Nuk mendoj që një Bashkim Evropian i cili edhe më tutje bllokohet nga 5 vende jonjohëse, të cilat në thelb kanë një politikë pro-ruse, Sllovakia e Fico-s, mund të ketë rrol në një dialog të ndërmjetësuar nga ana e Bashkimit Evropian”, tha ai.

Hoxhaj kritikoi ashpër qasjen e kryeministrit Albin Kurti, duke theksuar se gjatë vitit 2025 Kurti ka treguar se ose i krijon institucionet sipas kushteve dhe parametrave të tij, ose i përjashton të gjithë të tjerët.

“Se cfarë ka ndodhë në 2025, mund të përsëritet në një version edhe më të errët në 2026. z. Kurti na ka bërë me dije gjatë 2025 që ai ose i krijon institucionet me kushtet e tij, parametrat e tij dhe me kushtet e tij të të menduarit ose i përjashton të gjithë të tjerët.”, ka thënë Hoxhaj në rtv21.

Enver Hoxhaj kujtoi edhe sulmin publik të Kurtit me termin “hajvanat”, duke nënvizuar se nuk ishte drejtuar opozitës, por qytetarëve që nuk ia dhanë votën.

“Kur ai e ka sulmu opozitën me termin “hajvanat” nuk e ka pas me ne, e ka pas me ata që nuk ia kanë dhanë votën”, tha Hoxhaj.

Hoxhaj paralajmëroi se vitit 2026 i duhet kthjellim politik, përndryshe Kosova rrezikon të humbasë edhe më shumë kohë teksa Shqipëria pritet të anëtarësohet në BE në vitet 2029–2030.

Në fund, Hoxhaj theksoi se tash është në dorën e qytetarëve t’i japin vendit qartësinë që i duhet.

“Ose kemi me u kthjellë brenda vitit 2026 ose ky vend mund të krijojë një qartësi për veten kur e sheh Shqipërinë në 2029-30 duke u anëtarësu në BE. Atëherë ka mundësi që na bjen ndërmend që i kemi humbë 10 vite prej 2019-20 deri 2030. Tash është në dorë të qytetarëve a dojnë me i ofru vendit qartësi”, ka shtuar në fund Hoxhaj.

Misioni i OSBE-së në Kosovë ka thënë se sjellja e anëtarit të Vetëvendosjes në KQZ, Sami Kurteshi, ndaj gazetarëve është e papranueshme.

OSBE tha se liria e medias dhe diskursi publik i përgjegjshëm janë thelbësore për demokracinë e Kosovës.

“Përfaqësuesit politikë në organet e pavarura duhet të mbështesin standardet më të larta të profesionalizmit dhe respektit”, thuhet në reagimin e OSBE-së.

Gjuhën agresive të Kurteshit kundrejt gazetarëve dhe Asociacionit të Gazetarëve të Kosovës e ka dënuar edhe Zyra e BE-së në Kosovë dhe organizata tjera që mbrojnë të drejtat e gazetarëve.

Kurteshi, në një reagim publik, e quajti AGK-në “Aleancë të Grupeve Kriminale” dhe listoi një sërë mediash, që sipas tij operojnë si “vrasës me pagesë”.

Për këto akuza, AGK tha se përveç që janë të pabaza, paraqesin rrezik real për sulme të mundshme në të ardhmen ndaj gazetarëve dhe pjesëtarëve të mediave në punën e tyre profesionale në terren.

Kryetari i ri i Mitrovicës së Jugut, Faton Peci, njoftoi se ka kërkuar thirrjen e mbledhjes inauguruese të Kuvendit Komunal.

Mbledhja, siç njoftoi ai, pritet të mbahet më 12 dhjetor në mesditë.

“🇽🇰Mirëmëngjes qytetarë të Mitrovicës! ✍️Sot kam nënshkruar ftesën për thirrjen e mbledhjes inauguruese të Kuvendit të Komunës së Mitrovicës së Jugut, e cila do të mbahet më 12.12.2025, në ora 12:00. Kjo mbledhje shënon fillimin e realizimit të mandatit të dhënë nga vullneti i qytetarëve. Na priftë e mbara!”, shkroi Peci në një postim në profilin e tij në “Facebook”.

Ish-komandanti i UÇK-së për Zonën Operative të Llapit, Rrustem Mustafa, ka thënë se aty ku mungon transparenca, lind kaosi institucional, për çka thotë se sot në vend të qartësisë por bëhet lojë me institucione.

Mustafa thekson se institucionet nuk janë lodra politike, paraja publike nuk është karrem për vota, shteti nuk është pronë partie dhe se sipas tij koha e mashtrimit me vendime selektive po mbaron

Postimi i plotë:

Kur mungon transparenca, lind kaosi institucional

Transparenca duhet të jetë themeli i shtetit, jo viktimë e pasigurisë së pushtetit.

Sot, në vend të qartësisë, po shohim lojë me institucione. Në vend të ligjit, po shohim vendime që ndryshohen sipas interesit të ditës. Rasti i Listës Serbe është dëshmi e gjallë:

*Sot miratim buxheti.

* Nesër moscertifikim.

* Pasnesër rikthim i vendimit, siç ndodhi edhe gjashtë muaj më parë.

Kjo nuk është qeverisje. Kjo është hile politike mbi kurrizin e shtetit.

Qytetarët nuk kërkojnë defunksionalizim të institucioneve.

Qytetarët kërkojnë funksionalizim të plotë të shtetit:

për rend,

për ligj,

për rregull,

për mirëqenie.

Sot, kur besimi po bie, pushteti po përpiqet ta blejë me ndarje parash jo transparente, me projekte të shpejta, të paqëndrueshme dhe jashtë çdo logjike zhvillimi.

Kjo nuk është ndihmë sociale, kjo është joshje elektorale me hije korrupsioni.

Institucionet nuk janë lodra politike.

Paraja publike nuk është karrem për vota.

Shteti nuk është pronë partie.

Koha e mashtrimit me vendime selektive po mbaron.

Qytetarët sot kërkojnë vetëm një gjë: shtet serioz, të drejtë dhe transparent.