Ambasadori britanik në Kosovë, Jonathan Hargreaves, ka takuar kryeministrin në detyrë të Kosovës, Albin Kurtin.

Ai ka shkruar se shpreson që do të ketë formim të shpejtë të institucioneve pas zgjedhjeve të 28 dhjetorit.

“Sot u takova me kryeministrin në detyrë Albin Kurti. Diskutuam fushatën zgjedhore dhe shpresat për një proces zgjedhor të qetë që mundëson formimin e shpejtë të institucioneve në vitin e ri. Kjo është thelbësore për progresin urgjentisht të nevojshëm në fusha të tilla si buxheti kombëtar. Diskutuam gjithashtu nevojën që qeveria e ardhshme të rifillojë progresin në dialogun e lehtësuar nga BE-ja dhe integrimin evropian dhe masat aktive për të lehtësuar integrimin e mëtejshëm të komuniteteve jo-shumicë të Kosovës. Shpresoj që të mund të thellojmë partneritetin Mbretëri e Bashkuar-Kosovë me qeverinë e ardhshme”, ka shkruar Hargreaves.

Menaxheri i Agjencisë së Shërbimeve të Navigacionit Ajror, Sherif Gosalci, përmes një statusi në Facebook paralajmëroi temperatura ekstreme në natën e ndërrimit të vitit, duke thënë se ato do të zbresin deri në -20 gradë.

Kjo deklaratë e tij nisi të demantohej nga disa platforma meteorologjike dhe kjo deklaratë e tij e vuri në lëvizje edhe Institutin Hidrometeorologjik të Kosovës, i cili sipas ligjit është i vetmi institucion që mund të bëjë njoftime të tilla bazuar në kompetencat që ia jep ligji.

Ky institut tha: Parashikimi zyrtar i motit dhe paralajmërimi i hershëm i fatkeqësive të mundshme natyrore me origjinë hidrometeorologjike për Republikën e Kosovës jepet nga IHMK dhe janë ekskluzivitet i IHMK-së.

Gjithashtu, Instituti tha se parashikimi i besueshëm i motit është i kufizuar në ditë me shkallë të saktësisë.

Prandaj, IHMK tha se çdo subjekt apo individ tjetër që bënë njoftim, parashikim apo paralajmërim për motin, fillimisht është i jashtëligjshëm e më pas jo profesional dhe shkencërisht i padrejtë.

“Standardet e parashikimit të motit përfshijnë rregullat globale të Organizatës Botërore të Meteorologjisë  (OBM) për të dhënat, terminologjinë dhe saktësisë, me besueshmëri të lartë (80%+) për parashikimet afatshkurtra (1-3 ditë) dhe saktësi në rënie për periudha më të gjata, duke përdorur kode dhe kritere të standardizuara”, thuhet ndër të tjera në reagim.

Njoftimi i plotë i IHMK:

Reagim publik

Të nderuar qytetarë të Republikës së Kosovës, ditëve të fundit nëpër media dhe portale është shpërndarë lajmi që ky fund vit do të shoqërohet me temperatura ekstreme minimale deri – 20°C dhe me borë, të cilat kanë paraqitur konfuzion dhe shqetësime.

Instituti Hidrometeorologjik i Kosovës, është i vetmi institucion që mund të bëjë njoftime të tilla bazuar në ligjin Ligjin Nr. 06/L -035 për Veprimtarinë Hidrometeorologjike, Neni 13 Sistemi i paralajmërimit të hershëm për ngjarjet e jashtëzakonshme hidrometeorologjike, neni 28 Lëshimi i informacionit të përgjithshëm meteorologjik dhe hidrologjik.

Neni 9, pika 2 mes tjerash thuhet: Parashikimi zyrtar i motit dhe paralajmërimi i hershëm i fatkeqësive të mundshme natyrore me origjinë hidrometeorologjike për Republikën e Kosovës jepet nga IHMK dhe janë ekskluzivitet i IHMK-së.

Andaj çdo subjekt apo individ tjetër që bënë njoftim, parashikim apo paralajmërim për motin, fillimisht është i jashtëligjshëm e më pas jo profesional dhe shkencërisht i padrejtë.

Standardet e parashikimit të motit

Standardet e parashikimit të motit përfshijnë rregullat globale të Organizatës Botërore të Meteorologjisë  (OBM) për të dhënat, terminologjinë dhe saktësisë, me besueshmëri të lartë (80%+) për parashikimet afatshkurtra (1-3 ditë) dhe saktësi në rënie për periudha më të gjata, duke përdorur kode dhe kritere të standardizuara.

Shërbimet Hidrometeorologjike Nacionale janë institucionet kompetente për vrojtime dhe Paralajmërime të Hershme të motit.

Matja e elementëve kryesorë atmosferikë si temperatura, presioni, era, lagështia, reshjet dhe mbulesa e reve, duke përdorur mjete si satelitë, radarë dhe sensorë tokësorë. Parashikuesit më pas i analizojnë këto kushte aktuale me modele moti dhe modele historike për të parashikuar gjendjet e ardhshme, duke lëshuar alarme (vëzhgime, paralajmërime, këshilla) bazuar në nivelet e besimit dhe pragjet specifike të rrezikut.

Saktësia e parashikimit: Përgjithësisht e lartë për 1-3 ditë (80-90%), duke rënë ndjeshëm për 5-10+ ditë (rreth 50%)

1. Parashikimi afatshkurtër

• 0–3 ditë – 72 orë (Shumë i saktë), Përdoret për motin ditor (shi, temperatura, erë dhe është standard për parashikimet publike)

2. Parashikimi afatmesëm

• 4–7 ditë (Saktësi mesatare), modelet me shkallë të gjerë të motit (vala të nxehti, fronte të ftohta) zakonisht parashikohen mirë

3. Parashikimi i zgjatur

• 8–14 ditë (Saktësi e ulët për detaje), jepen vetëm tendenca, jo kushte të sakta (p.sh. “më ngrohtë se mesatarja”)

4. Afatgjatë / perspektivë (jo parashikim i drejtpërdrejtë)

• Javë deri muaj (Bazohet në modele klimatike (El Niño, La Niña), epet si probabilitet, jo si mot.

Standard shkencor kryesor

• Për shkak se atmosfera është dinamike parashikimi i besueshëm i motit është i kufizuar në rreth 7–10 ditë.

Ish-kryeministri i Kosovës, Isa Mustafa, ka deklaruar se gjuha e zbutur e akterëve të Lëvizjes Vetëvendosje është pjesë e strategjisë së fushatës së tyre zgjedhore.

Në një intervistë për Periskopin, Mustafa ka thënë se qëllimet e LVV-së mbeten të njëjta dhe se kërkesa e saj për ta qeverisur vendin e vetme është shqetësuese.

“Ndryshimi është vetëm në strategjinë e fushatës. Nuk ka të bëjë fare me sjelljen pas fushatës, sepse qëllimet janë të njëjtat, ndërsa mjetet edhe më perfide. Është e frikshme kur një subjekt politik kërkon dhe synon ta qeverisë i vetëm Kosovën. Në fakt, për ta dhunuar. Dhe aq më keq është të shohësh viktimat të dashuruara me dhunuesit e shtetit dhe me dhunuesit e tyre”, ka thënë ai.

Duke folur për zhvillimet e fundit politike, Mustafa u shpreh se gjendja në Kosovë nuk është normale, prandaj edhe rezultatet zgjedhore janë të vështira për t’u parashikuar.

“Është vështirë të parashikohet rezultati, sepse gjendja nuk është normale. Në një situatë jonormale zakonisht mungon rezultati i arsyeshëm. Mendoj se duhet të fillojë të mbizotërojë arsyeja për të shpresuar dhe besuar në rezultate”, theksoi ai.

Megjithatë, Mustafa u bëri thirrje partive të tjera politike që të mos e imitojnë VV-në dhe të hyjnë në zgjedhje me synimin për të fituar e për të qeverisur, e jo për të qëndruar në opozitë.

“Është shumë e mundshme dhe tepër e nevojshme që partitë e ish-opozitës ta formojnë qeverinë, dhe ato mund ta bëjnë këtë. Por për ta arritur këtë, duhet të ndalen së kopjuari apo imituari VV-në. Duhet të jenë të gatshme të marrin vendime me rrezik politik dhe të marrin përgjegjësi para qytetarëve. Duhet të vetëdijësohen se në zgjedhje hyhet për të fituar dhe për të qeverisur, e jo për të qëndruar në opozitë”, ka deklaruar Mustafa për Periskopin.

Ndërkohë, Presidentja Vjosa Osmani pritet të organizojë një takim me mërgimtarët dy ditë para zgjedhjeve, më 26 dhjetor. Në ftesë theksohet se ky është një takim tradicional.

Mustafa i cili dikur ka qenë bashkëpunëtor i Osmanit, tha se takimet me diasporën janë të mirëseardhura, por vetëm në kohën e duhur, e jo gjatë fushatës zgjedhore.

Ai ngriti dyshime për qëllimet e këtij takimi dhe për mesazhet që Osmani mund t’u drejtojë mërgimtarëve.

“Takimet me diasporën janë të mira, por në kohë dhe rrethana të arsyeshme, jo në kohë fushate. Shtrohet pyetja: çfarë do të kërkojë dhe çfarë do t’u thotë Vjosa bashkatdhetarëve tanë një ditë para votimit? Pse të mos i ftojë një ditë pas votimit?”, ka thënë ai.

Mustafa gjithashtu ka deklaruar se Presidentja Osmani nuk po e mban anën e Kushtetutës.

“Vjosa Osmani nuk po e mban anën e Kushtetutës që e obligon të jetë institucion që promovon unitetin e popullit”, ka theksuar ai.

Në fund, Mustafa ka shtuar se performancën e Vjosa Osmanit si presidente mund ta vlerësojë më së miri Albin Kurti.

“Performancën e Vjosës mund ta vlerësojë më së miri Albin Kurti, në rolin e punëdhënësit”, ka deklaruar Mustafa.

Presidentja e Kosovës, Vjosa Osmani, ka folur rreth procesit të aplikimit të Kosovës në Bashkimin Evropian (BE).

Ajo tha se kjo është diçka për të cilën kanë punuar për një kohë shumë të gjatë.

“Praktikisht kemi aplikuar vetëm disa vite më parë, shpresojmë që aplikimi ynë të jetë në tryezën e anëtarëve të Këshillit shumë, shumë shpejt. Në fakt, si identitet, si shtet, si komb, ne kemi kontribuar në vlerat mbi të cilat qëndron Bashkimi Evropian për shekuj me radhë. Dhe kështu besojmë fuqishëm se, ndonëse është një proces shumë kompleks, nëse do të përdorej kriteri i bazuar në meritë, Kosova në fakt do të kishte qenë një nga pararendëset deri tani”, tha ajo në intervistë për Euronews.

Sipas saj, procesi është kompleks në rastin tonë edhe për shkak të pesë shteteve mosnjohëse të BE-së, e për të cilat tha se “ne vërtet shpresojmë se do ta kuptojnë se Kosova si anëtare e Unionit nuk është vetëm në dobi të popullit të Kosovës, por është një imperativ strategjik, është një imperativ i sigurisë për të gjithë kontinentin”.