Në këto ditë dimri bora ka mbuluar malin e Tomorit, duke ofruar një pamje piktoreske.
Kryeministri i Shqipërisë, Edi Rama, ndau në rrjetet sociale pamje nga statuja e Abaz Aliut në malin e Tomorit.
“Kartolinë nga mali i Tomorit”, shkruan Rama.
Tyrbja e Abaz Aliut ndodhet në malin e Tomorit, i cili është një destinacion turistik për adhuruesit e aventurës, vëzhgimit dhe patjetër edhe për besimtarët që kryejnë pelegrinazh.
Çdo fundgushti nga data 20 deri në datën 25, në këtë vend organizohet një ritual dhe një festë madhështore nga besimtarët e sektit bektashi, e cila përbën festën më të rëndësishme të vitit.
Mali i Tomorit shtrihet në verilindje të qytetit të Çorovodës, në një largësi rreth 20-25 km dhe gëzon statusin e Parkut Kombëtar. Aty nuk mungojnë ngjitjet sportive në shpatet me borë apo aventurierë të raftingut në kanionet e Osumit.
Nën këmbët e Tomorit, rrjedh Lumi Osum që duke zbritur nga terrene tepër malore ka krijuar kanionet e famshme të tij tepër të vizituara, sidomos gjatë stinës së verës.
Por, jo vetëm kanionet, në këtë itinerar gjenden dhe disa objekte kulti të feve kristiane e bektashiane dhe monumente të natyrës dhe të kulturës.
