Në ditën e fundit të Festivalit Teatror Ndërkombëtar “Skampa Extension”, në Bibliotekën Publike të Elbasanit u promovua libri më i ri i shkrimtarit dhe kritikut të njohur të artit, Miho Gjini, me titull “Brezi i tretë i aktrimit”.
Vepra ruan kujtesën e skenës shqiptare. Ajo është një homazh për 25 artistë të rinj të skenës dhe ekranit, të konsideruar si brezi i tretë i aktrimit. Miho Gjini sjell librin e tij të 38-të, pas 65 vitesh në shërbim të artit, si një dëshmi dashurie, përkushtimi dhe mirënjohjeje për teatrin.
Miho Gjini është një nga kritikët më të vlerësuar të artit shqiptar, veçanërisht në skenën e teatrit dhe ekranit. Ai lindi më 20 mars 1938 në fshatin Piqeras të Himarës. Studimet e larta i përfundoi në Shkollën e Lartë të Aktorëve, ku u diplomua si aktor dhe regjisor, me specializim në kritikë teatri.
Ai u emërua drejtor dhe regjisor i Teatrit Profesionist “Skampa” të Elbasanit, ku realizoi dy shfaqje të rëndësishme: dramën “Justina” dhe komedinë “Kutia prej argjendi”, raporton atsh.
Pas tre vitesh, Miho Gjini mori detyrën e Inspektorit të Përgjithshëm të Teatrove dhe Estradave të Republikës, duke kontribuar njëkohësisht edhe si pedagog i jashtëm në Institutin e Arteve për 12 vite.
