Numër i madh i përdoruesve të aplikacionit mjaft të njohur edhe tek ne, WhatsApp kanë njoftuar për marrjen e një njoftimi, i cili i paralajmëron për mundësinë e mbylljes së llogarisë së tyre në rrjetin social Facebook.
Një lexues i portalit Storm, ka dërguar në redaksinë tonë njoftimin që kishte marrë dhe i cili e kishte shqetësuar për të dhënat e tij që i ka të vendosura në këto aplikacione.
“Të dashur përdorues! Me keqardhje ju informojmë se llogaria juaj në Facebook do të çaktivizohet përgjithmonë brenda 12 orëve të ardhshme. Ky vendim u mor sepse morëm raporte për llogarinë tuaj duke imituar dikë tjetër. Kjo është një shkelje serioze e standardeve tona të komunitetit. Nëse nuk veproni tani, do të humbasësh aksesin në llogarinë tende përgjithmonë! Ky është shansi juaj i fundit për të mbrojtur llogarinë tuaj”, shkruante në paralajmërim.
Me pak ndryshime, por me kuptim të njëjtë, një lexues tjetër i portalit tonë ka marrë një mesazh të tillë.
Madje atij i është dërguar edhe një vegëz (link), përmes të cilit ai mund të ndërmerrte veprime për të mos mbyllur Facebook-un e tij.
Storm ka pyetur kompaninë Meta e cila ka nën menaxhim rrjetin social Facebook dhe aplikacionin WhatsApp, por deri në momentin e publikimin, nga ta nuk është dhënë asnjë sqarim.
