Për dy javë me radhë, Kosova do të jetë nikoqire e ushtrimit më të madh ushtarak ndërkombëtar në rajon, “Defender Europe 25”, që organizohet nga Ushtria e Shteteve të Bashkuara për Evropë dhe Afrikë.
Sipas një njoftimi nga Ministria e Mbrojtjes, stërvitja do të zhvillohet nga data 26 maj deri më 9 qershor dhe do të përfshijë lëvizje të shumta të konvojeve ushtarake nga vendbazimet e Forcës së Sigurisë së Kosovës drejt rajonit të Gjakovës, përkatësisht në Aeroportin e Gjakovës dhe poligonin ushtarak në Babaj të Bokës.
Ministria ka kërkuar mirëkuptimin e qytetarëve për lëvizjet e automjeteve ushtarake gjatë kësaj periudhe, duke theksuar rëndësinë e këtij ushtrimi për gatishmërinë dhe ndërveprueshmërinë e FSK-së me forcat partnere ndërkombëtare.
“Përmes këtij ushtrimi, Forca e Sigurisë së Kosovës do të demonstrojë gatishmërinë operacionale dhe aftësinë për të vepruar në përputhje me standardet e partnerëve të saj strategjikë,” thuhet në njoftim. Në stërvitje do të marrin pjesë edhe forca ushtarake nga SHBA, Shqipëria, Kroacia, Maqedonia e Veriut dhe Bullgaria.
