Disa dhjetëra njerëz u vranë dhe më shumë se 100 u lëduan pasi një zjarr përfshiu një bar të mbushur me njerëz në vendpushimin e skive zvicerane Crans-Montana derisa festonin Vitin e Ri.
Zjarri filloi rreth orës 01:30 në barin Le Constellation, ku ishin mbledhur më shumë se 100 persona, tha policia kantonale e Valais. Vendi ka një kapacitet prej 400 personash.
Policia fillimisht deklaroi se “disa njerëz humbën jetën dhe të tjerë u plagosën” në atë që e përshkroi si një incident serioz.
Numri i viktimave u përditësua më vonë, por numri i vërtetë i viktimave mbetet i paqartë.
Ministria italiane e Jashtme deklaroi se “rreth 40” persona u vranë, duke cituar policinë zvicerane.
Zëdhënësi i policisë, Gaëtan Lathion, tha më parë se autoritetet po shihnin shumë viktima.
“Më shumë se njëqind njerëz ishin në ndërtesë dhe po shohim shumë të plagosur dhe shumë të vdekur”, u tha ai gazetarëve.
Raportet e mëparshme përshkruan një shpërthim, por policia më vonë e karakterizoi ngjarjen si një zjarr me origjinë të papërcaktuar.
Mediat zvicerane raportuan se zjarri mund të jetë shkaktuar nga piroteknikat gjatë një koncerti, megjithëse autoritetet theksuan se shkaku mbetet nën hetim.
Burime mjekësore i thanë transmetuesit lokal RTS se spitalet në të gjithë Zvicrën frëngjishtfolëse ishin të mbingarkuara duke trajtuar viktimat e djegieve.
Policia, zjarrfikësit dhe disa helikopterë u dërguan në vendngjarje. Shërbimet e emergjencës e vunë zjarrin nën kontroll ndërsa operacionet e shpëtimit vazhduan.
Autoritetet e mbyllën plotësisht zonën dhe vendosën një zonë ndalim-fluturimi mbi Crans-Montana.
“Jemi vetëm në fillim të hetimit tonë, por ky është një vendpushim skijimi me famë ndërkombëtare dhe shumë turistë”, tha Lathion.
Autoritetet caktuan një konferencë për shtyp për të enjten në orën 10:00 sipas orës lokale.
Crans-Montana ndodhet në Alpet Zvicerane, rreth 40 kilometra në veri të Matterhorn, ose rreth dy orë larg nga Berna.
Qyteti turistik luksoz me rreth 15,000 banorë të përhershëm tërheq vizitorë ndërkombëtarë për pistat e skive, restorantet e shkëlqyera dhe skenën e gjallë pas skive.
Crans-Montana është planifikuar të presë ngjarjet e skijimit me shpejtësi të Kupës së Botës FIS më vonë këtë muaj.
