Një ndërtese e “Lesna-s” në lagjen “Kalabria” në Prishtinë është përfshirë nga zjarri.
Në vendin e ngjarjes ka arritur autoambulanca, policia dhe ekipet tjera të nevojshme.
Një banor dëgjohet duke thënë “marum prej tymit”, ndërkohë në atë zonë është krijuar edhe tollovi.
Zjarrfikësit kanë evakuuar disa banorë, përmes shkalleve të automjeteve, nga katet e larta të një ndërtese të përfshirë nga zjarri në Lagjen Kalabria.
Po ashtu, bëhet e ditur se janë shpëtuar edhe dy fëmijë nga ndërtesa që është përfshirë nga zjarri.
Ndryshe, lajmin për media e ka konfirmuar zëdhënësja e Policisë për rajonin e Prishtinës, Flora Ahmeti.
“Sot rreth orës 18:40, kemi pranuar informatën për një incident zjarri në një ndërtesë në lagjen Emshir në Prishtinë. Menjëherë në vendin e ngjarjes kanë dalë policia dhe zjarrfikësit të cilët po merren me rastin”, ka thënë Ahmeti.
Derisa po vazhdon evakuimi banorëve të ndërtesës, bazuar në të dhënat e deritanishme disa persona janë duke u trajtuar nga ekipet mjekësore, kryesisht probleme që janë shkaktuar nga tymi, ka thënë Ahmeti.
