Banorët janë zënë të befasuar kur nga Gili u njoftuan se ajo bashkë me djalin e saj, kanë vendosur ta lënë përfundimisht shtëpinë e famshme.
Ajo i njoftoi banorët se Redoni kishte dalë më herët nga shtëpia pasi nuk po mund të përballonte izolimin.
Ky vendimi i ka zënë në befasi banorët, të cilët në shumicë nuk u besonin fjalëve të Gilit, fillimisht duke menduar se ajo po luante ndonjë lojë.
Egli, e cila dukej se kishte filluar një pëlqim me Redonin, u step nga ky hap, ndërsa gjithë kohën thoshte se ai nuk i kishte thënë asnjë fjalë për një largim të mundshëm.
Ajo shpërtheu në vaj në një nga dhomat, ndërsa në një diskutim me njërën nga banoret, ajo tha se kishte kërkuar sqarime në dhomën e rrëfimit dhe ia kishin thënë të njëjtën informatë që ia kishte thënë edhe Gili.
“Mua më thanë që Redoni ka qenë ai që ka marrë vendimin për të dalë jashtë pasi s’ka mundur ta përballoj izolimin, më pas ky informacion i është dhënë Gilit. Të paktën doja që Redoni të më përqafonte fortë e të më jepte ndonjë indikacion që do dilte”, tha Egli e përlotur.
Për arsyet e largimit kishte edhe një debat të madh brenda banorëve, shumë prej të cilëve kishin dyshime nëse ato që i ka thënë Gili ishin të vërteta.
