Dy burrat e arrestuar si të dyshuar për të ashtuquajturën “grabitje e shekullit” në Muzeun e Luvrit kanë zgjedhur të mos përgjigjen ndaj pyetjeve të hetuesve, duke u mbështetur në “të drejtën për të heshtur”.
Sipas “Le Parisien”, ata po mbahen që prej mbrëmjes së së shtunës në zyrat e njësisë speciale të policisë në Paris.
Megjithëse të njohur për autoritetet, të dhënat e tyre penale deri më sot përfshijnë kryesisht vjedhje të vogla, ofendime dhe dëmtime fizike, pa ndonjë lidhje të drejtpërdrejtë me rrjete të krimit të organizuar.
Hetimet kanë përfituar nga një sërë provash të mbledhura nga ekipi kriminalistik në vendngjarje, një skenë që ditët e fundit është bërë e famshme në mbarë botën dhe e fotografuar gjerësisht. Identifikimi i të parit prej të dyshuarve, një 39-vjeçar me shtetësi të dyfishtë francezo-algjeriane, u bë përmes flokëve të gjetura brenda një helmete motoçiklete të braktisur nga autorët gjatë arratisjes.
I dyshuari i dytë, me shtetësi franceze dhe origjinë nga Mali, u identifikua përmes gjurmës së ADN-së në jelekun e verdhë që kishte veshur teksa përdorte një makineri ngritëse për t’u ngjitur në fasadën e galerisë dhe për të hyrë brenda saj.
Arrestimet u përshpejtuan pasi autoritetet zbuluan se njëri prej tyre po përgatitej të nisej me avion drejt Algjerisë nga aeroporti Roissy. Hetuesit dyshojnë se të arrestuarit janë personat që hynë në muze dhe morën bizhuteritë e vlefshme, ndërsa shpresojnë që përmes hetimeve të mëtejshme të mund të zbulojnë edhe pjesën tjetër të rrjetit dhe urdhëruesit e mundshëm.
Pavarësisht kërkimeve të gjera, dy persona të tjerë të grupit – që prisnin jashtë muzeut me skuterë të ndezur – vazhdojnë të jenë në arrati. Ndërkohë, bizhuteritë e grabitura më 19 tetor, në vetëm pak minuta, ende nuk janë gjetur.
