Lipjan: Mërgimtari ia bllokon makinën në garazh qytetares – ajo tregon pse nuk thirri policinë
Një qytetare nga Lipjani ka ndarë për “Storm•” një përvojë të pazakontë, ku makina e saj mbeti e bllokuar për më shumë se katër orë brenda garazhit të shtëpisë.
Sipas saj, një mërgimtar kishte parkuar automjetin e tij menjëherë prapa makinës së saj, duke ia pamundësuar daljen. Ngjarja ka ndodhur në rrugën “Jeta e Re” në Lipjan.
“E ruajta qetësinë, mendova që ishte mysafir te vëllai. Por kur e dëgjova se ndezi makinën, dola ta pyes pse kishte vepruar kështu. Ai u largua me shpejtësi si i çmendur,” ka rrëfyer ajo.
E pyetur pse nuk njoftoi policinë, qytetarja është shprehur se besoi se bëhej fjalë për ndonjë mysafir të afërmve, prandaj priti disa orë para se të reagonte.
Rasti ka ngjallur reagime për mungesën e kujdesit dhe respektit ndaj pronës së të tjerëve, sidomos gjatë sezonit të pushimeve kur mërgimtarët janë më të pranishëm në vend.
