Bashkimi Evropian ka reaguar pas mos-certifikimit të dy partive serbe në Kosovë, duke paralajmëruar se një veprim i tillë rrezikon karakterin gjithëpërfshirës të zgjedhjeve lokale.
Në një deklaratë zyrtare, BE-ja shprehet e zhgënjyer me vendimin dhe kritikon qëndrimin e Lëvizjes Vetëvendosje gjatë procesit të certifikimit. “Partitë që i plotësojnë kriteret ligjore duhet të lejohen të marrin pjesë në zgjedhje dhe të përfaqësohen përmes një procesi të lirë, të ndershëm dhe gjithëpërfshirës,” thuhet në reagim.
Ky mesazh përkon me reagimet e mëparshme të QUINT-it dhe Shteteve të Bashkuara të Amerikës, të cilat po ashtu e kanë cilësuar mos-certifikimin e partive serbe si goditje ndaj demokracisë funksionale në Kosovë.
BE-ja thekson se pret nga institucionet e Kosovës që procesi të zhvillohet në përputhje me Kushtetutën, Ligjin për Zgjedhjet e Përgjithshme dhe parimet e sundimit të ligjit, ndërsa paralajmëron se do të monitorojë nga afër zhvillimet.
