Fakulteti i Arteve të Bukura Tiranë ka rinisur marrëdhënien historike mes tij dhe Fakultetit të Arteve në Prishtinë, në kuadër të të cilës do të ketë një seri ekspozitash të përbashkëta, shkëmbime eventesh dhe studentësh.
Ky dialog viziv mes dy institucioneve i ka fillesat në vitet ’70, por ditën e djeshme rinisi tradita me ekspozitën e pedagogut të Pikturës në Fakultetin e Prishtinës, Agron Bytyçi.
Ekspozita vetjake e Bytyçit, e titulluar “Komunikim”, do të presë adhuruesit e pikturës në Galerinë FAB deri më 22 dhjetor.
Kuratori i saj është prof. asc. dr. Zef Paci, historian arti. Në tekstin e tij kuratorial, Paci shprehet për autorin Bytyçi se, prirja artistike e autorit, me anë të simbolikës së çuditshme, me copëzimin e peizazhit të mistershëm, lëviz në territorin e surrealizmit.
Në rininë e tij, gjatë kohës së studimeve akademike, Bytyçi është ndeshur dhe joshur nga surrealizmi dhe figurativiteti surrealist.
Ajo çka mbisundon përherë në të gjitha peizazhet është prania njerëzore me personazhe enigmatikë të ardhur prej kohësh të ndryshme. Shtresëzimi ndodh më së shumti në zonën e kokës si një fragmentim i mendimit e vetëdijes. Personazhet, duke ruajtur diçka solemne, në caqet e patetikes e të kitch-it, të denatyruar si skulptura a manekinë plastikë, kthehen vërtet në muza shqetësuese.
Fjalori surrealist i artistit përcjell tema bashkëkohore të shekullit XXI mbi mekanizimin, fragmentimin, robotizimin emocional të subjektit në epokën digjitale, mbi trysninë e informacionit dhe komunikimin e këputur.
Sipas Pacit, pikturat e Agron Bytyçit, përcjellin një atmosferë të fortë psikologjike, ku qeniet shndërrohen në simbolet e krizave të mbrendshme të njeriut bashkëkohor dhe përbëjnë një alegori moderne të ankthit social.
