Elon Musk është thirrur në një seancë gjyqësore urgjente të enjten lidhur me çmimet prej 1 milion dollarësh që ai u ka dhënë votuesve të regjistruar në shtetet e pavendosura.
Shefi ekzekutiv i Tesla dhe X është urdhëruar nga një gjykatës në Filadelfia, Pensilvani të trajtojë një çështje civile nga prokurori më i lartë i qytetit për të ndaluar Musk dhe komitetin e tij të veprimit politik, America PAC, që të japin paratë.
Musk akuzohet për operimin e një llotarie të paligjshme dhe përpjekje për të ndikuar tek votuesit në zgjedhjet presidenciale të javës së ardhshme mes Kamala Harris dhe Donald Trump .
Musk dhe PAC po mbështesin kandidatin republikan Trump.
Miliarderi kontrovers premtoi se do të jepte 1 milion dollarë çdo ditë për votuesit e regjistruar në shtetet e luhatshme, të cilët kanë nënshkruar peticionin e tij për lirinë e fjalës në internet dhe për të drejtat e armëve.
1 milion dollarët e parë iu dhanë një burri të quajtur John Dreher gjatë një veprimtarie fushate në Pensilvani më 19 tetor.
53-vjeçari kishte dhuruar 75 milionë dollarë për PAC amerikane në periudhën deri në mes të tetorit.
Dokumentet e paraqitura nga prokurori i qarkut të Filadelfias, Larry Krasner, zbuluan gjithashtu se padia kundër Musk kishte “shkaktuar një ortek postimesh [në media sociale] nga ndjekësit e Musk”, shumë prej të cilëve “bënë sulme antisemitike ndaj Krasner”.
Avokati kërkoi siguri të shtuar për seancën, e cila fillimisht ishte planifikuar për të premten, pasi përdoruesit në X kishin publikuar adresën e shtëpisë së Krasner.
