Redaksia Qendrore në bashkëpunim me Qendrën e Botimeve Enciklopedike Albanologjike (QBEA), pjesë e Akademisë së Shkencave të Shqipërisë zhvilluan takimin për miratimin e fjalësit të projektit madhor “Enciklopedia Shqiptare” nga 25 deri në 27 shtator.
Takimet u zhvilluan në sallën “Akademikët” pranë Akademisë së Shkencave me drejtimin e kryeredaktorit të veprës akad. Skënder Gjinushi, kryetar i Akademisë së Shkencave të Shqipërisë, dhe zëvendëskryeredaktorit akad. Mehmet Kraja, kryetar i Akademisë së Shkencave dhe Arteve të Kosovës.
Takimi u mbajt për miratimin nga redaksia qendrore të fjalësve të 13 fushave: arkeologjia; mesjeta, bizanti, periudha osmane + rilindja; komunikimi dhe mjetet e komunikimit; sistemet politike dhe drejtësia; diaspora; gjuhësia / albanologjia; artet; arsimimi; energjitë dhe energjitika; inxhinieritë, ndërtimtaria dhe arkitektura; mjekësia; letërsia; historia e shekulli XX, në vijim të takimit të mëparshëm që u mbajt në Durrës në datat 25-28 qershor 2025.
Në ditën e tretë u bënë diskutimet dhe konkluzionet përmbyllëse.
Në projektin madhor “Enciklopedia shqiptare” përfshihen 27 fusha. Me këtë takim përfundon procesi i njësimit të kriterit shkencor me tre bashkëpunuesit, Shqipëri, Kosovë, Maqedoni e Veriut.
