Jeffrey Epstein planifikoi një “dhomë lojërash” (playroom) në një hotel me pesë yje pranë Buckingham Palace, pasi një bashkëpunëtor i Andrew Mountbatten-Windsor e inkurajoi atë ta blinte.
Financieri i ndjerë shfaqi interes për marrjen e Dukes Hotel, i njohur si vendlindja e koktejlit Vesper Martini të James Bond, sipas emaileve të publikuara nga Departamenti i Drejtësisë i SHBA javën e kaluar.
David Stern, një biznesmen i cili më vonë u bë drejtor i nismës Pitch@Palace të ish-Dukës së Jorkut, e këshilloi Epstein-in të blinte hotelin dhe ta kthente katin e fundit në “dhomën e tij të lojërave në Londër”. Një burim i paidentifikuar sugjeroi gjithashtu që Epstein duhet ta blinte ndërtesën në mënyrë që të kishte “hapësirë për shumë P“, një frazë e përdorur vazhdimisht në dosjet Epstein për të përshkruar marrëdhëniet seksuale me gratë.
Në vitin 2010, Sultan Ahmed bin Sulayem, një biznesmen nga Dubai që zotëronte Dukes Hotel, kërkoi këshilla financiare nga Epstein. Megjithëse nuk akuzohet për asnjë shkelje, Sulltani dërgoi një propozim drejtuar Jes Staley-t (bankier në JP Morgan), të cilin Epstein e ndoqi me interes personal si blerës i mundshëm.
Emaili i zbardhur (Korrik 2010): “Sulltani përmendi se zotëron Dukes Hotel në Londër. Shkova ta shoh. Vendndodhje e shkëlqyer… Këtë duhet ta blejmë, bëje katin e lartë rezidencën tënde në Londër, të kesh vend për shumë P dhe shërbim të plotë hoteli.“
Stern i shkroi sërish Epsteinit: “Po mendoja të shihja dhomat nesër… Dhoma jote e lojërave në katin e fundit – pas disa rinovimeve – është diçka që ende më pëlqen.“ Epstein u përgjigj shkurt: “Shikoje.”
Lidhja me Princin Andrew dhe Elon Musk
Dokumentet tregojnë se Epstein dhe Andrew ruajtën një marrëdhënie miqësore edhe pas arrestimit të Epsteinit në vitin 2010, pavarësisht pretendimeve të Princit se i kishte shkëputur lidhjet. Andrew, i cili mohon çdo shkelje, u pa duke u zhvendosur nga Royal Lodge në Windsor të martën.
Në vitin 2015, Sulltani kontaktoi sërish Epstein-in për ndihmë me grupin e tij të hoteleve dhe për të rregulluar një takim me Elon Musk, me qëllim hapjen e një salloni Tesla në Dubai. Epstein ia përcolli mesazhin një personi tjetër, duke pyetur nëse ishin ende në kontakt me “Kimbal“ (vëllai i Elon Musk).
