Lufta në Ukrainë ka hyrë në vitin e pestë, por për Evropën kërcënimi rus nuk po largohet. Përkundrazi, nga Franca deri në Baltik, qeveritë dhe ushtritë evropiane po përgatiten për një periudhë shumë më të rrezikshme të përballjes me Moskën.
Shefi i Shtabit të Përgjithshëm të Forcave të Armatosura franceze, gjenerali Fabien Mandon, ka dhënë një prej paralajmërimeve më të forta deri tani. Gjatë një dëgjimi në Asamblenë Kombëtare franceze, ai deklaroi se perspektiva e një “lufte të hapur” me Rusinë mbetet shqetësimi i tij kryesor sa i përket përgatitjes së ushtrisë franceze.
Shqetësimi lidhet edhe me ritmin e riarmatimit rus. Sipas shifrave të paraqitura nga Mandon, Rusia kishte rreth 1.3 milion ushtarë në vitin 2025, ndërsa projektohet të arrijë në 1.9 milionë deri në vitin 2030. Numri i tankeve të rënda, sipas tij, mund të rritet nga rreth 4,000 në 7,000 në të njëjtën periudhë.
Por shqetësimi evropian nuk lidhet vetëm me mundësinë e një konflikti konvencional. Vendet perëndimore po përballen gjithnjë e më shumë me atë që e përshkruajnë si luftë hibride ruse: sabotime, sulme kibernetike, operacione ndikimi dhe ndërhyrje kundër infrastrukturës kritike.
Një analizë e CSIS evidentoi se numri i sulmeve ruse të regjistruara në Evropë pothuajse u trefishua nga 2023 në 2024. Ndërkohë, IRIS vlerëson se aktivitetet hibride që i atribuohen Rusisë dhe Bjellorusisë u shtatëfishuan ndërmjet viteve 2022 dhe 2024.
Dhe kërcënimi nuk është vetëm teorik. Vetëm ditët e fundit, Gjermania akuzoi Rusinë për organizimin e një tentative sulmi me dron në aeroportin Leipzig/Halle. Moska i ka mohuar akuzat. Zyrtarë evropianë të mbrojtjes dhe inteligjencës paralajmërojnë se Evropa ende nuk ka krijuar një mekanizëm mjaftueshëm efektiv për të frenuar operacione të tilla.
Mesazhi nga Parisi është se Evropa duhet të jetë e përgatitur pa krijuar panik. Mandon e përshkroi periudhën aktuale si të rrezikshme dhe argumentoi se pikërisht për këtë arsye nevojiten investime më të mëdha në mbrojtje. Ai paralajmëroi gjithashtu se prioritetet amerikane dhe evropiane nuk përputhen më në të njëjtën mënyrë si më parë, megjithëse bashkëpunimi mes strukturave ushtarake vazhdon.
Nga Baltiku deri në Francë, tabloja po ndryshon: Evropa nuk po planifikon më vetëm si ta ndihmojë Ukrainën — po përgatitet edhe për mundësinë që kërcënimi rus të afrohet drejtpërdrejt te territori i NATO-s.
