Më 13 mars të vitit 1965 në Florida, të SHBA-së, ndërroi jetë një nga figurat më të rëndësishme të kombit shqiptar, Fan Stilian Noli.
Rrugëtimi i tij jetësor iu kushtua në mënyrë të konsiderueshme veprimtarive të lidhura me politikën kombëtare.
Fan S. Noli lindi më 6 janar 1882 në Ibrik Tepe, pranë Edrenesë. Vetë do të pohonte se, prejardhjen e kishte nga Kolonja.
Kishtaria ishte një busull që e drejtoi jo vetëm drejt priftërisë por edhe e motivoi edhe në përkushtimin ndaj kauzës kombëtare. Gjithë jetën e tij produktive ia kushtoi veprimtarive dhe politikës kombëtare shqiptare, përkthimit dhe krijimtarisë letrare.
Fan Noli ishte një prej shqiptarëve që bëri shumë më tepër vepra se bashkëkohësit e tij: përktheu në shqip shërbesat e Kishës Ortodokse, përktheu kryevepra të letërsisë botërore, shkroi poezi politike, ishte klerik, themelues i Kishës Ortodokse Shqiptare në SHBA, deputet dhe kryeministër i Shqipërisë në të njëjtën kohë, etj.
I vendosur ne SHBA, i dha zë shqipes, duke mbajtur për herë të parë liturgji në gjuhën amtare, në kishën e Bostonit.
Në 27 dhjetor 1923 u zgjodh deputet i Korçës, ndërsa më herët kishte qenë deputet i Kolonisë së Amerikës. Ai ishte figura kryesore e Lëvizjes së Qershorit të 1924-ës dhe u zgjodh kryeministër pas përmbysjes së qeverisë së Iljaz Vrionit.
