Prishtinë, 30 Janar 2026 – Ish-Ministri i Bujqësisë, Pylltarisë dhe Zhvillimit Rural, Faton Peci, është paraqitur sot në Prokurori për të dhënë sqarime lidhur me një kallëzim penal të ngritur ndaj tij nga Lidhja Demokratike e Kosovës (LDK).
Përmes një reagimi të ashpër menjëherë pas dëshmisë, Peci ka bërë të ditur se sulmet ndaj tij janë të orkestruara dhe të bazuara në shpifje.
Përballja në Prokurori
Peci deklaroi se ishte i hapur dhe transparent para organeve të drejtësisë lidhur me procesin e granteve në Ministrinë që ai drejton. Ai theksoi se roli i tij ka qenë plotësisht konform ligjit, duke hedhur poshtë pretendimet e LDK-së.
Akuzat ndaj Paris Gurit: “Vota të vjedhura dhe kallëzim i rrejshëm”
Ministri nuk ka kursyer as akuzat direkte ndaj ish-deputetit të LDK-së, Paris Guri, i cili ishte iniciatori i kallëzimit penal. Peci e cilësoi Gurin si “ish-deputet të zgjedhur me vota të vjedhura të mërgatës”.
“Shumë shpejt, do t’iu drejtohem organeve të drejtësisë me një kallëzim penal kundër kallëzimit të rrejshëm penal ndaj ish-deputetit me vota të vjedhura të mërgatës,” paralajmëroi Peci, duke shtuar se ky është një kundërsulm ndaj asaj që ai e quan “fushatë shpifjesh dhe insinuatash të paqena”.
- Advertisement -
“Nuk më ndalin punët e mëdha”
Përkundër proceseve ligjore dhe presionit politik, Peci u shpreh i vendosur për të vazhduar detyrën e tij. Ai i siguroi qytetarët se tentativat për “baltosjen e emrit” nuk do ta pengojnë në punët e tij për Kosovën.
“Sulmet, akuzat e pabaza, gënjeshtrat, shpifjet, kërcënimet e përpjekja për baltosjen e emrit tim, nuk më ndalin nga punët e mira e punët e mëdha për Kosovën!”, përfundoi ai mesazhin e tij me moton “Vazhdojmë!”.
