Një valë reagimesh ka shpërthyer pas zbulimit të listave me emrat e fëmijëve të zyrtarëve të lartë iranianë që jetojnë në Amerikë, ndërsa prindërit e tyre po udhëheqin një luftë të përgjakshme kundër Uashingtonit.
Përderisa qielli i Iranit po digjet nga raketat amerikane dhe retorika e Teheranit po bëhet gjithnjë e më agresive, një realitet i fshehur po del në dritë. Shumë nga fëmijët e zyrtarëve më të lartë iranianë janë duke jetuar dhe duke u arsimuar pikërisht në “djepin e armikut”, në Shtetet e Bashkuara të Amerikës.
Ky fenomen i njohur si “Aghazadehs” ka nxitur një valë zemërimi në rrjetet sociale. Qytetarët po vënë re hipokrizinë e skajshme: derisa populli iranian po vuan pasojat e luftës dhe sanksioneve, elita e regjimit po dërgon pasardhësit e saj në universitetet më prestigjioze dhe më të shtrenjta amerikane.
Sipas raportimeve të fundit, bëhet fjalë për qindra djem dhe vajza të ish-udhëheqësve dhe zyrtarëve aktualë. Ata po shijojnë lirinë dhe luksin e Perëndimit, ndërsa prindërit e tyre vazhdojnë të predikojnë urrejtje ndaj stilit të jetesës amerikane dhe politikave të Shtëpisë së Bardhë në këtë kohë lufte.
Presioni po rritet edhe brenda Amerikës. Aktivistët po u bëjnë thirrje universiteteve lokale që të ndërpresin menjëherë vizat për këta studentë. Kërkesa kryesore është që ata të kthehen në vendin e tyre për të përjetuar të njëjtin realitet që prindërit e tyre po u ofrojnë miliona iranianëve të tjerë.
Kjo ndarje mes “thirrjeve për luftë” dhe “realitetit të luksit” po dëmton rëndë narrativën e regjimit. Ndërsa lufta po ashpërsohet, prania e fëmijëve të elitës iraniane në Amerikë mbetet një nga pikat më të ndjeshme që mund të nxisë trazira të brendshme brenda vetë Iranit dhe presion ndaj Pentagonit.
