Filmi i ri “Super Mario Galaxy Movie” ka nisur fuqishëm në kinematë botërore, duke grumbulluar rreth 372.5 milionë dollarë vetëm në ditët e para të shfaqjes.
Ky rezultat e rendit atë ndër debutimet më të mëdha të vitit, duke lënë pas Project Hail Mary, i cili ka pasur një hapje më të moderuar në tregjet ndërkombëtare dhe në Amerikën e Veriut.
Performanca e këtij produksioni i afrohet suksesit të The Super Mario Bros. Movie, i cili në vitin 2023 pati një nisje të fortë dhe më pas arriti të tejkalojë shifrën e 1 miliard dollarëve në rang global. Kjo dëshmon fuqinë e vazhdueshme të markës “Super Mario” në industrinë e filmit të animuar.
Me një buxhet prej rreth 110 milionë dollarësh, filmi është shfaqur në dhjetëra tregje ndërkombëtare. Interesi më i madh është regjistruar në vende si Meksika, Mbretëria e Bashkuar, Gjermania dhe Franca. Një rol të rëndësishëm në këtë sukses kanë luajtur edhe shfaqjet në formatin IMAX, të cilat kanë sjellë të ardhura të konsiderueshme që në fillim.
Ndërkohë, Project Hail Mary vazhdon të tërheqë publik dhe të ruajë një ritëm të qëndrueshëm në arkëtime, duke u pozicionuar si një nga filmat më të ndjekur të momentit.
Sipas analistëve të industrisë, të dy filmat pritet të dominojnë kinematë gjatë gjithë muajit prill, deri në daljen e Michael, i cili pritet të ngjallë interes të madh tek publiku në fund të muajit. /KultPlus
