Dy ekipe nga Togu i Xhenierëve Luftarak të Forcës së Sigurisë së Kosovës (FSK) kanë arritur një sukses të madh në garën shumëkombëshe “Dita e Unitetit”, duke zënë vendin e parë dhe të tretë në mesin e 15 ekipeve pjesëmarrëse nga Kroacia, Gjermania, Sllovenia dhe Kosova.
Kjo garë është zhvilluar në kuadër të ushtrimit fushor “Defender Europe 25”, konkretisht në segmentin “Immediate Response 25”, në Republikën e Kroacisë. Ekipet pjesëmarrëse janë testuar në aftësi fizike, teknike dhe bashkëpunuese.
Ministri në detyrë i Mbrojtjes, Ejup Maqedonci, ka përgëzuar pjesëtarët e FSK-së për këtë arritje.
“Togu i xhenierëve luftarak nga Forca e Sigurisë së Kosovës mori pjesë me dy ekipe, të cilët kanë demonstruar një performancë të dalluar duke shënuar sukses të jashtëzakonshëm në këtë garë sfiduese”, ka shkruar Maqedonci.
Togu i Xhenierëve Luftarak të FSK-së është dislokuar për herë të parë në ushtrime jashtë vendit si një kapacitet i ri, duke iu bashkuar Brigadës së Mekanizuar të Forcave të Armatosura Kroate në kuadër të ushtrimit shumëkombësh “Defender Europe 25”.
