Blake Lively pretendon se gra të tjera ngritën shqetësime për Justin Baldoni në xhirimet e ‘It Ends With Us’ në padinë e saj të fundit
storm•/Hollywood: Në një ankesë të përditësuar, avokatët e Blake Lively shtuan gati 50 faqe në padinë e tyre kundër aktorit bashkëprotagonist, Justin Baldoni, duke detajuar më tej akuzat fillestare të Lively për ngacmim seksual dhe hakmarrje.
Në padinë e re, e cila u depozitua në një gjykatë federale në Nju Jork të martën, pak para afatit të caktuar nga gjykatësi, Lively jep më shumë detaje mbi pretendimin e saj se gra të tjera që punonin në xhirimet e filmit “It Ends With Us” u ndjenë të pakëndshme nga “sjellja e padëshiruar” e Baldonit dhe iu besuan asaj.
Sipas ankesës së Lively, një tjetër aktore e filmit ngriti shqetësime për Baldoni pranë kompanisë Sony, e cila shpërndan filmin.
“Znj. Lively ngriti këtë padi sepse ajo ishte një nga ‘dy gratë’ që z. Baldoni ‘një milion përqind’ … ‘i bëri të ndiheshin të pakëndshme’ gjatë xhirimeve të filmit,” thuhet në padinë e përditësuar. “Znj. Lively nuk ishte e vetmja që ndjehej e pakëndshme në xhirime, dhe z. Baldoni dhe kompania e tij, Wayfarer, e dinin këtë. Pasi z. Baldoni mësoi se kishte bërë që znj. Lively dhe të tjerat të ndiheshin të pakëndshme, ai e përmbysi të gjithë narrativën e tij të TED Talk dhe aktivizmit ‘feminist’.”
Sipas padisë, pasi Lively raportoi shqetësimet e saj për sjelljen e Baldonit në maj 2023, një tjetër aktore raportoi shqetësimet e saj për sjelljen e Baldonit pranë një përfaqësuesi të Sony-t dhe njërit nga producentët e filmit.
Kur përfaqësuesi i Sony ndau shqetësimet me Baldonin, ai “iu përgjigj asaj aktoreje me shkrim, duke pranuar se ishte në dijeni të shqetësimeve të saj dhe se do të bëheshin rregullime,” thuhet në ankesë.
Një javë më vonë, sipas padisë së Lively, e njëjta aktore i tha Lively-t për shqetësimet e saj në rritje mbi kushtet në xhirime dhe se e kishte të vështirë të komunikonte me Baldonin.
Avokatët e Lively pretendojnë se, në vend që të bënte rregullime për t’i bërë gratë të ndiheshin më rehat në xhirime, Baldoni më pas u hakmor ndaj Lively-t duke punësuar një ekip menaxhimi krizash dhe duke nisur një fushatë për të dëmtuar reputacionin e saj.
Përfaqësuesit e Baldonit nuk iu përgjigjën menjëherë kërkesës së CNN për koment mbi padinë e përditësuar të Lively-t.
Lively gjithashtu ka shtuar dy akuza të reja në padinë e saj – përfshirë shpifjen – duke pretenduar se avokati i Baldonit, Bryan Freedman, ka bërë komente shpifëse për të në media, si hakmarrje për ngritjen e akuzave ligjore kundër Baldonit.
Freedman “publikon rregullisht deklarata provokuese për mediat, duke u shfaqur në çdo program që e fton,” thuhet në padi, “duke thënë çfarëdo, qoftë e vërtetë apo e rreme, për të dëmtuar besueshmërinë e znj. Lively dhe për të frikësuar të tjerët që të mos flasin në mbështetje të saj.”
Freedman nuk iu përgjigj menjëherë CNN për koment.
Në një deklaratë për CNN, avokatët e Lively-t, Esra Hudson dhe Mike Gottlieb, thanë:
“Padia përfshin prova domethënëse që Lively nuk ishte e vetme në ngritjen e shqetësimeve për sjellje të papërshtatshme gjatë xhirimeve më shumë se një vit para se filmi të editohej; si dhe prova të detajuara për kërcënimet, ngacmimet dhe frikësimin jo vetëm të znj. Lively, por edhe të shumë të tjerëve që janë bërë viktima të fushatës hakmarrëse të të paditurve.”
Si u arrit këtu?
Padia e përditësuar e Lively është zhvillimi më i fundit në betejën ligjore mes saj dhe Baldonit, të cilët luajtën bashkë në filmin hit “It Ends With Us”, një film që trajton çështjet e dhunës në familje.
Lively fillimisht e akuzoi Baldonin për ngacmim seksual dhe hakmarrje në dhjetor, përmes një ankese për të drejtat civile, para se të ngrinte padinë e plotë.
Ajo pretendon se pasi ngriti shqetësime për sigurinë në punë dhe sjelljen e Baldonit në xhirime, ai dhe ekipi i tij orkestruan një fushatë të fshehtë për ta dëmtuar reputacionin e saj në mediat sociale dhe tabloide.
Të paditurit përfshijnë Baldonin, bashkëpunëtorët e tij të biznesit, përfshirë një publicist dhe një ekip menaxhimi krizash, si dhe kompaninë e tij të produksionit, Wayfarer Studios.
Baldoni i ka mohuar akuzat e Lively. Në një padi të tijën, ai ka akuzuar Lively-n dhe bashkëshortin e saj, Ryan Reynolds, për përpjekje për ta dëmtuar reputacionin e tij dhe për të marrë kontrollin kreativ të filmit.
Baldoni po padit çiftin dhe publicistin e tyre personal për 400 milionë dollarë. Ai gjithashtu po padit “The New York Times” për 250 milionë dollarë, duke pretenduar se gazeta bashkëpunoi me ekipin e Lively për të publikuar një artikull me një narrativë të njëanshme në dhjetor. NYT ka mohuar pretendimet e Baldonit dhe ka thënë se qëndron pas raportimit të tij.
Të martën, avokatët e Lively-t thanë për CNN se ata do të kërkojnë të hedhin poshtë paditë e Baldonit kundër saj dhe Reynolds, duke deklaruar se do të ecin përpara me procesin ligjor për të zbuluar “shqetësimet tronditëse për thellësinë e përpjekjeve të të paditurve për ta ‘varrosur,’ ‘shkatërruar’ dhe ‘dëmtuar’ znj. Lively dhe familjen e saj.”
Drejt një gjyqi në 2026
Përplasja publike mes Lively dhe Baldonit u vu re gjatë turneut promovues të filmit në 2024, por eskalimi në një betejë të hapur ligjore është i rrallë, pasi zakonisht yjet zgjedhin t’i zgjidhin çështjet privatisht për të shmangur ekspozimin në rrjetet sociale.
Javën e kaluar, avokatët e Lively dhe Baldonit kërkuan nga gjykatësi që të shmanget ndërmjetësimi, duke treguar se nuk ka hapësirë për një marrëveshje dhe se çështja do të shkojë në gjyq në mars 2026.
Në shkurt, gjykatësi i paralajmëroi të dy palët që të shmangin deklaratat publike që mund të ndikojnë në procesin gjyqësor. Nëse përpiqen ta gjykojnë çështjen në media, ai ka të drejtë të përshpejtojë gjyqin.
