Aktivistja e politikave të energjisë, Janina Ymeri, ka publikuar një reagim të ashpër ndaj Doganës së Kosovës, duke e akuzuar për fshehje të të dhënave lidhur me importin e energjisë elektrike për periudhën janar-maj 2025.
Në një postim në Facebook, ajo ka bërë të ditur se Dogana e Kosovës ka hequr tërësisht të dhënat dhe raportimin për tregtinë e energjisë nga publikimi më i fundit zyrtar “Open Data”, që përfshin periudhën janar-maj 2025.
“Energjia elektrike po importohet, por të dhënat po fshihen. E kam thënë disa herë në emisione – importi i energjisë në Kosovë është shumë i lartë, çdo ditë mbi 1 milion euro. Sot të dhënat zyrtare të Doganës për periudhën janar-maj 2025 nuk shfaqin asnjë import të deklaruar si energji elektrike. As edhe një. Kjo është e pamundur”, thekson ajo.
Ajo ngrit pyetjen nëse institucioni është vënë në shërbim të fshehjes së së vërtetës.
“Dogana e Kosovës, a ju thanë hiqni importin e rrymës mos ta kuptojë populli sa pare ju marrim? A ju thanë hiqni kodin 2716 edhe u tha u bë?”, pyeti ajo.
Duke e krahasuar situatën me një skenar orwellian, Ymeri përmend partinë në pushtet.
“Vëllau i Madh vëzhgon apo jo, Big Brother aka VV: Ata po na dëgjojnë, po na shikojnë, por ndërkohë po i fshehin të dhënat”.
Sipas saj, fshirja e të dhënave nuk është vetëm çështje teknike, por një goditje e drejtpërdrejtë ndaj transparencës dhe të drejtës qytetare për t’u informuar për mënyrën se si shpenzohen paratë publike.
“Po luajnë me transparencën, me faturat tona, me të drejtën tonë për ta ditur sa paguajmë e kujt po i shkojnë ato miliona.”
Ajo thekson se pushteti nuk qëndron në parti politike që vijnë e shkojnë, por në institucione që duhet të jenë profesionale dhe të pavarura.
Aktualisht, Dogana e Kosovës nuk ka dhënë asnjë sqarim publik për heqjen e të dhënave mbi importin e energjisë në raportin “Open Data” për pesëmujorin e parë të vitit 2025.
