Zyra e Prokurorit të Specializuar ka ngritur akuza ndaj ish-presidentit Hashim Thaçi për vepra penale të pengimit të drejtësisë, sipas një Aktpadie të konfirmuar.
ZPS ka njoftuar se Thaçi ndodhej në Objektin e Paraburgimit të Dhomave të Specializuara të Kosovës kur iu dorëzua një fletë-arrestim dhe ndaj tij janë ngritur tri akuza për pengim të personave zyrtarë në kryerjen e detyrave zyrtare, tri akuza për shkelje të fshehtësisë së procedurës dhe katër akuza për mosbindje ndaj gjykatës.
Ai do të paraqitet para një Gjykatësi të Procedurës Paraprake të Dhomave të Specializuara të Kosovës lidhur me akuzat për vepra penale shtesë të ngritura kundër tij.
ZPS-ja ka konfirmuar arrestimin e Bashkim Smakajt, Isni Kilajt dhe Fadil Fazliut në Kosovë sipas një fletë-arrestimi dhe urdhri transferimi të lëshuar nga një Gjykatës i Procedurës Paraprake të Dhomave të Specializuara të Kosovës për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës.
“Zotërinjtë Smakaj, Kilaj dhe Fazliu janë transferuar në Objektin e Paraburgimit të Dhomave të Specializuara të Kosovës në Hagë dhe do të paraqiten edhe ata para gjykatës pa vonesa të papërligjura. Hajredin Kuçit i është lëshuar fletëthirrje për paraqitje para Dhomave të Specializuara, e cila ka ngritur kundër tij dy akuza për mosbindje ndaj gjykatës”, thuhet në njoftimin e Gjykatës Speciale.
