Në një zhvillim të ri mes tensioneve në rritje Izrael–Iran, një grup hakerësh pro-izraelitë kanë kryer një sulm kibernetik të bujshëm, duke arritur të vjedhin mbi 90 milionë dollarë në kriptovaluta nga shkëmbimorja më e madhe iraniane. Lajmi është bërë publik sot nga burime ndërkombëtare të specializuara në çështjet e sigurisë kibernetike dhe ekonomisë digjitale.
Kjo goditje vjen në një moment kur spekulimet për një konflikt të mundshëm ushtarak mes dy shteteve janë intensifikuar ndjeshëm. Ekspertët e sigurisë kibernetike vlerësojnë se ky është një ndër sulmet më të mëdha të profilit financiar kundër infrastrukturës digjitale iraniane.
Deri tani autoritetet iraniane nuk kanë dalë me ndonjë deklaratë zyrtare për humbjet e raportuara, ndërkohë që qeveria izraelite nuk ka komentuar mbi rolin eventual të agjencive të veta në këtë sulm.
Situata mbetet e tensionuar, ndërkohë që fronti kibernetik duket se po bëhet një fushëbetejë e re në konfliktin Izrael–Iran.
